Выключанага з-за непрыемнага паху ног галяндзкага студэнта аднавілі ва ўнівэрсытэце праз 10 год

Студэнт філязофіі Тэўніс Тэнбрук быў адлічаны ў 1999 годзе з ратэрдамскага Erasmus University, бо студэнты й выкладчыкі ўвесь час скардзіліся на жахлівы пах ад ягоных ног. Кажуць, смурод быў настолькі моцны, што ў адной аўдыторыі з гора-студэнтам ніхто проста ня вытрымліваў. Але ў выніку разьбіральніцтва судзьдзя заявіў, што ніхто ня меў права адлічаць студэнта і параіў іншым «заткнуць насы».

Пра незвычайны выпадак паведамляе выданьне Ananova. Тэўніс патлумачыў у судзе, што пасьля забароны наведваць лекцыі спрабаваў вучыцца самастойна ва ўнівэрсытэцкай бібліятэцы, каб не адстаць ад праграмы, але ў хуткім яго пазбавілі чытальніцкага білету і забаранілі ўваход у чытальню.

Аднаўленьню студэнта ў пэўнай ступені рады й ўнівэрсытэт: цяпер студэнт верне некалькі дзесяткаў кніг, якія ён так і ня змог вярнуць своечасова ў бібліятэку з-за забароны ўваходу.

Выданьне паведамляе, што пасьля агучваньня судовага рашэньня кіраўніцтва ўнівэрсытэту заявіла, што ня будзе болей забараняць студэнтам «зь непрыемным пахам» наведваць заняткі, але ўвядзе сыстэму штрафаў.