Аддзяленьне амбасады Швэцыі адкрыла беларускамоўны сайт

Швэцыя стала яшчэ бліжэй — сёньня запрацаваў сайт Аддзяленьня амбасады Швэцыі ў Менску. Па словах кіраўніка Аддзелу Стэфана Эрыксана, «гэта будзе не самы жывы сайт», але ўся інфармацыя аб дзейнасьці Аддзяленьня зараз даступная кожнаму на беларускай і швэдзкай мовах. Сайт аздоблены па ўзоры сайтаў швэдзкіх амбасадаў па ўсім сьвеце.

Што вельмі зручна, на сайце можна знайсьці і форму для атрыманьня візы. Тым больш актуальна ў сьвятле хуткага адкрыцьця паўнавартаснай Амбасады Швэцыі, а другой палове году.

А пакуль Аддзяленьне на чале са Стэфанам працуе ў звычайным рэжыме — то бок, прапануючы беларусам цэлы шэраг культурніцкіх праектаў і падзеяў.

Што чакае беларусаў бліжэйшым часам?

Ключавымі імёнамі, якія задаюць накірунак працы Аддзяленьня, а хутка і Амбасады, ёсьць Астрыд Ліндгрэн, Інгмар Бэргман і Карл Лінэй.

Стагодзьдзе знакамітай казачніцы адсьвяткавалі ў мінулым годзе, але бязь ейнага ўдзелу не абыдзецца і бягучы год. Так, ужо можна набыць перакладзенага на беларускую мову «Карлсана», прычым на тарашкевіцы. Хутка пабачыць сьвет і Піпі-Доўгаяпанчоха.

300 год сёлета спаўняецца Карлу Лінею. Ён быў, што б там не сьпявалі N.R.M. У гонар вялікага навукоўцы пройдзе вандруючая выстава, праўда не чарапах і кітоў, а фотаздымкаў расьлін. У выставы два назовы: «Гербарый каханьня» і больш інтрыгуючы «Аб сэксуальным жыцьці расьлін».

Адразу пасьля Лацінскай Амэрыкі макраздымкі можна будзе пабачыць цягам месяцу з 13 сакавіка ў Нацыянальным музэі гісторыі і культуры.

Да вялікага жалю, у мінулым годзе сышоў з жыцьця вялікі рэжысэр Інгмар Бэргман. З 11 па 25 лютага ў Менску, Магілёве і Берасьці ўвазе беларускіх аматараў будзе прадстаўлена рэтраспэктыва 9 фільмаў, адмыслова падрыхтаваная для Ўсходняй Эўропы. Прыемным сюрпрызам стане пераклад на беларускую мову. Таксама будзе магчымасьць паглядзець адзін фільм на мове арыгіналу з ангельскімі субтытрамі.