Паліцыя Вэнэсуэлы разагнала студэнцкую акцыю гумовымі кулямі

Паліцыянты Каракаса ўжылі слёзатачывы газ і гумовыя кулі для разгону дэманстрантаў, абураных рашэньнем Уга Чавеса пазбавіць эфіру тэлевізійны канал, які дазваляў сабе крытычныя заўвагі ў бок кіраўніцтва краіны.

Студэнты заблякавалі адну паласу руху на буйнейшай аўтамагістралі праз некалькі гадзін пасьля таго, як апоўначы Radio Caracas Television спыніла вяшчаньне. Прыватны канал замянілі новым, які фінансуецца дзяржавай.

У выніку разгону акцыі 4 чалавекі былі параненыя гумавымі кулямі і дзесяткі пацярпелі ад слёзатачывага газа.

Чавес забараніў трансляцыю RCTV на нацыянальных хвалях, абвінаваціўшы тэлеканал у "падрыўной" дзейнасьці і падтрымцы дзяржаўнага перавароту 2002 года, накіраванага супраць яго рэжыму.

Новы дзяржаўны канал – TVES – пачаў сваё вяшчаньне з выступу артыстаў, якія выконвалі песьні ў падтрымку Чавеса. Затым была паказаная спартовая праграма і ток-шоў. Усё гэта перамяжоўвалася дзяржаўнай рэклямай: "Зараз Вэнэсуэла належыць усім".