Беларускія ўніверсітэты засталіся без рэпутацыі

Times Higher Education апублікаваў рэйтынг 100 універсітэтаў свету з найлепшай рэпутацыяй. У сотню трапіў Маскоўскі дзяржаўны ўніверсітэт, а вось Беларускаму дзяржаўнаму, гэтак сама як і ўсім іншым ВНУ Беларусі месца ў ёй не знайшлося.

Times Higher Education штогод публікуе шэраг адукацыйных рэйтынгаў. Гэта і лепшыя 400 ВНУ свету, і лепшыя 50 «новых» універсітэтаў. Учора быў абвешчаны спіс 100 універсітэтаў з найлепшай рэпутацыяй сярод топавых навукоўцаў з найбольшым аўтарытэтам. Складальнікі рэйтынгу пагаджаюцца, што спіс суб’ектыўны, але кажуць, што ніхто не можа ацаніць рэпутацыю ВНУ лепей за саміх навукоўцаў.

Беларускім ВНУ не шанціць у рэйтынгах Times. Аднак апошнімі гадамі ў іх даволі нядрэнна атрымлівацца прасочвацца ў спісы лепшых, якія складаюцца ў Гішпаніі і Вялікабрытаніі. Да прыкладу, у мінулым годзе БДУ упершыню прабіўся ў перадапошнюю сотню рэйтынгу 700 лепшых універсітэтаў свету Quacquarelli Symonds. З чым звязаныя поспехі беларускіх ВНУ у сусветных рэйтынгах — даследаванне Generation.by

Зрэшты, няма ў сотні ВНУ з найвышэйшай рэпутацыяй універсітэтаў і з іншых краін з нашага рэгіёну. Акрамя МДУ туды не трапілі ні польскія, ні ўкраінскія, ні літоўскія ВНУ. Аднак перад гэтымі ўніверсітэтамі, у адрозненні ад беларускіх, не стаіць амбітная задача ўвайсці ў лік 300 лепшых у свеце. Менавіта такія планы агучыў нядаўна рэктар БДУ Сяргей Абламейка.

Што да лепшых у свеце, то лідэрства ў World Reputation Ratings ужо трэці год ўтрымлівае Гарвардскі ўніверсітэт, якому саступаюць Масачусэцкі тэхналагічны інстытут і Кембрыджскі ўніверсітэт. Тэндэнцыяй апошніх гадоў стаў значны рост прысутнасці ў рэйтынгу азіяцкіх ВНУ. Чытайце на Generatio.by пра тое, як жывецца беларускім студэнтам у кітайскіх універсітэтах.