Віцэ-прэм’ер прапанаваў адмовіцца ад навучання эканамістаў і юрыстаў у тэхнічных і аграрных ВНУ

Віцэ-прэм’ер беларускага ўраду Анатоль Тозік заклікаў «аптымізаваць набор на спецыяльнасці» беларускіх універсітэтаў. Гэтым разам пад крытыку Тозіка патрапілі аграрныя і тэхнічныя ВНУ, што рыхтуюць юрыстаў і эканамістаў.

Паводле слоў віцэ-прэм’ера, надышла пара аптымізаваць выдаткі, прааналізаваць, чаму ў рэгіёнах і Менску знаходзяцца побач ўстановы адукацыі з дублюючымі адзін аднаго спецыяльнасцямі, факультэтамі.

«Трэба ўважліва прааналізаваць сітуацыю і па-гаспадарску Міністэрству адукацыі прыняць рашэнне аб магчымым спыненні набору на няпрофільныя спецыяльнасці ў некаторых навучальных установах», — мяркуе Анатоль Тозік.

У якасці прыкладу ён прывёў некалькі навучальных устаноў, у назвах якіх ёсць словы «аграрны», «політэхнічны», але пры гэтым яны выпускаюць юрыстаў, эканамістаў, спецыялістаў сферы абслугоўвання і дзяржслужачых. Аб гэтым паведамляе БелТА.

У прыватнасці, урад турбуе значная доля эканамістаў, юрыстаў і праграмістаў, што рыхтуюць ВНУ Міністэрства сельскай гаспадаркі. Такіх там чацвёртая частка, піша «Народная газета».

Плаціць за адукацыю прымусяць болей?

Акрамя гэтага Тозік вярнуўся да сваёй даўняй ідэі аб павелічэнні платы за адукацыю на найбольш запатрабаваных у моладзі спецыяльнасцях. На калегіі Міністэрства адукацыі, прысвечанай пытанням правядзення ўступнай кампаніі ў 2012 годзе, Тозік сказаў, што навучанне тых, хто хоча вучыцца за свае сродкі, мусіць быць выгодным ВНУ:

«Гэта не справа, калі, набіраючы студэнтаў-платнікаў на некаторыя спецыяльнасці, ВНУ губляе сродкі, просіць дапамогі ў бюджэту з-за таго, што выстаўляе студэнтам мізэрныя сумы. Веды не могуць быць таннымі і, навучаючыся на платным аддзяленні ВНУ, студэнты павінны гэта разумець», — сказаў віцэ-прэм’ер.

У мінулым годзе Тозік спрабаваў дамагчыся значнага падвышэння платы для студэнтаў, што вучацца на некаторых запатрабаваных спецыяльнасцях, найперш эканамічнага і юрыдычнага накірунку. Аднак сваёй мэты ён не дасягнуў.

Канкурэнцыя ўзмацняецца, але бюджэтныя месцы дагэтуль не занятыя

Міністр адукацыі Сяргей Маскевіч

Міністр адукацыі Сяргей Маскевіч абвясціў аб «павелічэнні канкурэнцыі» паміж універсітэтамі за абітурыентаў. Цяпер выпускнікоў школы становіцца ўсё меней. Значыць, ВНУ рызыкуюць згубіць значныя грошы. Сёлета на 63.8 тысячы выпускнікоў набраліся 88 тысячаў першакурснікаў.

Ужо цяпер некаторыя бюджэтныя месцы застаюцца незанятымі. Пры гэтым дзяржава надалей будзе павялічваць набор на тыя спецыяльнасці, якія падаюцца ёй запатрабаванымі: IT, біятэхналогіі, сельскагаспадарчыя і медыцынскія.

Андрэй Сьмятаньнікаў 14:23, 30/11/2012 | Навіны |

Каментары праз FACEBOOK