Еўрадэпутат прапанаваў вучыць беларускіх студэнтаў у польскіх ВНУ бясплатна

Дэпутат Еўрапейскага парламенту ад Польшчы Марэк Мігальскі звярнуўся да кіраўніцтва польскіх універсітэтаў з прапановай зменшыць альбо адмяніць плату за навучанне для беларускіх студэнтаў.

У лісце, разасланым Мігальскім, прапануецца ўвесці адмысловую праграму навучання для студэнтаў з Беларусі. Ён падкрэсліў, што палітычная сітуацыя ў Беларусі працягвае пагаршацца. Маладыя людзі «часта не маюць магчымасці для адукацыйнага развіцця і палітычнай дзейнасці», таму выязджаюць за мяжу.

Як адзначыў Мігальскі, палягчэнне ўмоваў прыняцця беларусаў на навучанне ў польскія ВНУ стане важнай праявай польскай салідарнасці і падтрымкі беларускага народа.

У 2011 годзе ўрад Польшчы зацвердзіў 150 стыпендыяў для беларускіх студэнтаў, 50 стыпендыяў для дактарантаў і 10 навуковых стыпендыяў для выкладчыкаў. Усе стыпендыяты з Беларусі адправіліся бясплатна вучыцца па праграме імя Каліноўскага, што дзейнічае з 2006 году.