Міністар адукацыі бачыць небясьпеку ў працоўнай міграцыі ў Расею

Сяргей Маскевіч заявіў, што адзіная эканамічная прастора з Расеяй — галоўная небясьпека для павелічэньня мігранцкіх плыняў зь Беларусі. А Балоньскі працэс тут ні пры чым.

«У нас цяпер агульны рынак працы з Расеяй, асноўная міграцыя працоўных рэсурсаў ідзе тут, — заявіў міністар адукацыі Сяргей Маскевіч у інтэрвію «Народнай газэце».

Пры гэтым міністар лічыць, што далучэньне Беларусі да Балоньскага працэсу, якое можа адбыцца ў 2015 годзе, амаль не паўплывае на магчымасьці беларускай моладзі зьехаць з краіны:

«Я перакананы, што Балоньскі працэс на гэтыя напрамкі паўплывае вельмі і вельмі нязначна».

Зрэшты, пакуль мы не ў працэсе, ад міграцыі ратуе прымусовае разьмеркаваньне выпускнікоў:

«Сытуацыя з магчымай уцечкай спэцыялістаў з краіны вызначаецца ня тым, ці будзем мы ў Балоньскім працэсе і ці выйдзем на эўрапейскі рынак працы, а тым, наколькі прывабныя будуць працоўныя месцы ў Беларусі для моладзі», — кажа міністар і дадае:

«У нас сталая сыстэма разьмеркаваньня, якая пасьпяхова працуе».

Адказы на пытаньне "Ці жадаеце вы зьехаць у іншую краіну на пастаяннае месца жыхарства?" паводле ўзроста. Апытаньне зачыненае. Дадзеныя НІСЭПІ, 2012

Нядаўнія сацыялягічныя дасьледаваньні паказалі, што болей за дзьве траціны маладых беларусаў ад 18 да 24 гадоў жадаюць пераехаць у іншую краіну.

Аднак улады асабліва ня маюць рэцэптаў уплыву на сытуацыю:

«Мы занепакоеныя міграцыяй, гэта праблема няпростая, і вырашаць яе трэба з улікам таго, што акрамя зарплаты ёсьць і іншыя стымулы для стрымліваньня выезду спэцыялістаў у іншыя краіны. У першую чаргу, будаўніцтва жыльля», — заявіў у лістападзе 2011 году на паседжаньні ўраду прэм’ер-міністар Міхаіл Мясьніковіч.