Пінскія студэнты застаюцца зімаваць на баржы?

Працягваюцца жыльлёвыя прыгоды пінскіх студэнтаў, якія з пачатку навучальнага году жывуць на баржы пасярэдзіне Прыпяці. Туды іх засяліў мясцовы ўнівэрсытэт, паабяцаўшы пераезд у новы інтэрнат у сьнежні. Але грошы на будаўніцтва скончыліся, і замест новага інтэрнату студэнты атрымалі пэрспэктыву зімоўкі на баржы.

Фота сайту Пінскай судавэрфі

Як паведамляе «Эўрапейскай радыё» са спасылкай на пінскі тэлеканал «Вараг», будаўніцтва студэнцкай вёскі, куды ўжо ў сьнежні мусілі засяліцца болей за тысячу студэнтаў Палескага дзяржаўнага ўнівэрсытэту, прыпыненае з-за адсутнасьці фінансаваньня.

Студэнцкая вёска на 1 150 месцаў мусіла зьявіцца на месцы прыватнага сэктару на вуліцы Панковай у Пінску. Аднак з-за крызысу будаўніцтва апынулася пад пытаньнем. Таму мясцовым жыхарам, якія даўна рыхтаваліся да адсяленьня, не рамантавалі свае хаты і нават не думалі пра падрыхтоўку да зімы, прапанавалі замест новых кватэраў перазімаваць у інтэрнаце. А тых, хто не пажадае пераехаць, мясцовыя чыноўнікі прапанавалі дровы на абагрэў.

Якую альтэрнатыву прапануюць студэнтам ПалесДУ, што зь верасьня жывуць у нумарах плывучага гатэлю «Палесьсе», не паведамляецца. Зрэшты, «студэнцкая баржа», не адзінае праблемнае месца ўнівэрсытэту.

Агулам ў верасьні ВНУ не ставала 860 месцаў, таму навучэнцаў «расьпіхалі», дзе толькі была магчымасьць: некаторых дасялілі ў існыя студэнцкія інтэрнаты, паставіўшы там дадатковых 170 ложкаў. 75 чалавек з дазволу Нацыянальнага банку разьмясьцілі ў гасьцініцы «Ўнівэрсытэцкая», 22 — на баржы.