Вінсэнт разам з Булкам і Герасіменяй здымаюцца ў «першым беларускім моладзевым сэрыяле»

Сёньня ў Менску пачаліся здымкі моладзевага сэрыялу пра беларускую музыку, краіну і СНІД. У іх возьмуць удзел вядомыя музыкі, акторы і спартсмэны, у тым ліку рэпэр Вінсэнт, лідэр «J:Морс» Уладзімір Пугач, шоўмэн Яўген Булка, знакамітыя спартсмэнкі Аляксандра Герасіменя і Дар’я Домрачава.

Вінсэнт у ролі. Няхай і не галоўнай

8-сэрыйны фільм «Вышэй за неба», які здымаюць у Менску на грант Глябальнага фонду для барацьбы са СНІДам, сухотамі і малярыяй ААН, мусіць, як мяркуюць аўтары, стаць культавым сярод пакаленьня Y. У якасьці дадатковай фішкі сэрыялу выкарыстаюць аўтары дзьвюхмоўе герояў: размаўляць у фільме будуць як па-беларуску, гэтак і па-расейску.

За два месяцы да пачатку здымак, арганізатары, сярод якіх драматург і крэатыўны прадусар стужкі Андрэй Курэйчык, ён жа сцэнарыст сэрыялу, правялі кастынг жадаючых узяць удзел у кінапрацэсе. Такіх знайшлося каля 1.5 тысячы прафэсійных і ня надта актораў, таму адбор выклікаў пэўныя цяжкасьці і пачатак здымак адклалі.

Кастынг да сэрыялу прыцягнуў каля 1.5 тысячы жадаючых зьняцца ў кіно. Фота СНІД&ТБ

Сёньня ж у Менску ля офісу арганізацыі, што займаецца барацьбой за СНІДам, распачаліся непасрэдныя здымкі «Вышэй за неба». У першы дзень у іх бяруць удзел, як піша БелТА, «папулярныя ў моладзевым асяродку» рэпэр Вінсэнт, шоўмэн Булка і сьпявак Пугач.

Як паведамлялася раней, у сэрыяле будуць граць таксама вядомыя спартсмэнкі: плыўчыха Аляксандра Герасіменя, біятланістка Дар’я Домрачава і гімнастка Мяліта Станюта. Зрэшты, апошняя чуткі пра свой удзел не пацьвердзіла: яе трэнэр Ірына Ляпарская заявіла «Спартовай панараме», што да сканчэньня кар’еры Станюта «ня будзе здымацца ні ў якім фільме бяз згоды галоўнага трэнэра».

А вось Аляксандра Герасіменя ўжо адкрыта кажа пра свой удзел. Па яе словах, якія цытуе sport.tut.by, плыўчыха грае «ролю сяброўкі галоўнай гераіні, якая ставіць яе на праўдзівы шлях.

«Гуляю саму сябе — плыўчыху Аляксандру Герасіменю. Шчыра сказаць, да гэтага часу не прачытала сцэнар. З-за затрымак пакуль усё адкладаецца», — казала пераможца апошняга чэмпіянату сьвету за некалькі дзён да пачатку здымак.

Пра што фільм

Гэтак сьцісла падаюць аўтары сюжэт «Вышэй неба»:

«Галоўны герой — лідэр моднага гурту Мікіта Міцкевіч. Мікіта харызматычны, разумны, жыве па сваіх прынцыпах і не гатовы імі паступацца дзеля грошай. Ён сьмелы і стылёвы — сапраўдная ікона для дзяўчынак і ўзор для хлопцаў.

Мікіта атрымлівае задавальненьне ад свайго жыцьця і ведае, што гэты сьвет выдатны. У Мікіты адбываецца барацьба за лідэрства з вакалістам яго гурта Стасікам, які ўявіў сябе „зоркай“. Гурт болей на баку Мікіты. Але тут адбываецца падзея, якая перагортвае ўсё ягонае жыцьцё…».

Героі сэрыялу будуць размаўляць і па-беларуску, і па-расейску. Па словах аўтараў, гэткі прыём «упершыню выкарыстаны» ў сэрыяле, каб па максымуму наблізіць фільм да беларускіх рэалій.

Прэм’ера сэрыялу адбудзецца 14 лютага 2012 году.