Арганізатары Сьвята вулічнай музыкі: «у маладых людзей яшчэ не ўстаялася псыхіка»

Арганізатары Сьвята вулічнай музыкі патлумачылі, чаму Зьміцер Вайцюшкевіч і Аляксандр Кульлінковіч атрымалі адмову ў магчымасьці выступіць на імпрэзе, а таксама прыраўнялі палітыку да наркотыкаў і тэрарызму. Чакаецца, што на дзень гораду сьвята ў Траецкім прадмесьці прыцягне болей за паўсотні музыкаў самых розных стыляў і некалькі тысячаў гледачоў.

«Ідэя сьвята простая, — тлумачыць яго літоўскі натхняльнік, музыка і прадусар Андрыюс Мамантавас, — у адзін дзень усе проста выходзяць на вуліцы. І кожны сам вырашае, што і як яму граць». Сьвята стала адным з самых пасьпяховым мерапрыемстваў літоўскай сталіцы, гэтым годам прыйшло у сталіцы латвійскую, а ў 2012 годзе рыхтуецца перабрацца ў Піцер. Але апынуўшыся на глебе беларускай, Сьвята музыкі адчула значныя мэтамарфозы:

«Адна з асноўных умоваў сьвята вулічнай музыкі — ніякай палітыкі: ня мусіць быць палітычных тэкстаў, ня мусіць быць заклікаў да гвалту, тэрарызму, ужываньню наркатычных рэчываў», — кажа адна зь беларускіх арганізатарак сьвята Вераніка Паўлоўская, што засядае ў моладзевай палаце пры Менгарвыканкаме.

Арганізатары Сьвята вулічнай музыкі баяцца за «маладых людзей, у якіх яшчэ не ўстаялася псыхіка»

Спробай адхрысьціцца ад палітыкі спадарыня Паўлоўская тлумачыць неабходнасьць праверкі тэкстаў песень музыкаў, якія падалі заяўкі на ўдзел, а таксама зьместу праграмы іх выступу. Цікава, што ў Вільні арганізатары такога ж сьвята колькі гадоў абыходзяцца без папярэдняй цэнзуры музычных тэкстаў.

«Гэта сьвята, якое ня спушчанае недзе зьверху, — распавядае Андрыюс Мамантавас. — Людзі самі адчуваюць сябе арганізатарамі».

«Усё мусіць ісьці ад народу», — быццам пагаджаецца зь літоўцам, цытуючы Лукашэнку, дэпутат Менгарсавету, першы сакратар менскага БРСМ Юры Чачукевіч. А Вераніка Паўлоўская дадае:

«Мы хочам быць упэўненымі, што ня выйдзе які-небудзь гурт і не пачне заклікаць да чаго-небудзь маладых людзей, у якіх яшчэ не ўстаялася псыхіка».

Галоўны БРСМавец гораду лічыць, што формула «сэкс, наркотыкі, рок-н-рол» цяпер ня вельмі актуальная, а важна «чыстая творчасьць, чыстая культура» і ніякіх заклікаў «да нечага негатыўнага».

Два КПП і сем зонаў

Схема падзей

Каб ні ў каго ня ўзьнікла жаданьня парушыць формулу «чыстай творчасьці», у Траецкае запросяць БРСМаўскіх дружыньнікаў. Яны зоймуцца аховай падарку, дапамогай забесьпячэньня «прапускнога рэжыму» ў прадмесьці (трапіць у сем яго музычных зонаў можна будзе толькі праз два прапускныя пункты). І толькі чатыром тысячам чалавек адначасова. З улікам таго, што мерапрыемствы ў парку Горкага і ля лядовага палацу адмененыя, жадаючых паслухаць вулічных музыкаў апынецца на шмат болей.

Выступоўцаў будзе значна меней за гледачоў, аднак яны возьмуць разнастайнасьцю: на вуліцы выльецца і капаэйра, і джаз, і рок з фолькам. Толькі вось вядомых музыкаў на Сьвяце амаль ня будзе:

Забароненыя ў Беларусі Зьміцер Вайцюшкевіч і Аляксандр Кульлінковіч, якія падавалі заяўку на ўдзел у сьвяце — «гэта тыя вядомыя музыкі, якія зарабляюць на музыцы грошы, а мы найперш хочам даць шанец выступіць непрафэсійным калектывам», — тлумачыць адмову ў выступе найвядомейшым патэнцыйным удзельнікам імпрэзы Вераніка Паўлоўская.

«У нас няма нейкага такога адбору, што ты можаш граць, а ты ня можаш, — дзеліцца вопытам літовец Мамантавас. Адзінае патрабаваньне — каб музыкі ня надта гучна гралі», бо, бывае, гучныя бубны могуць заглушыць танюткую флейту суседняга вулічнага музыкі.

Зрэшты, іншыя прафэсіяналы, напрыклад, удзельнікі гуртоў «Нагуаль» ці даволі вядомыя ў Менску The Silicon і Re1ikt магчымасьць выступіць на сьвяце атрымалі.

«У нас не было нейкага прафэсійнага журы, якое б адбірала, хто прафэсіянал, а хто не», — дадае Юры Чачукевіч. Па яго словах, Вайцюшкевіча з Кульлінковічам «ведаюць усе, і для гэтых музыкаў ёсьць дастатковая колькасьць фэстываляў, у нашай краіне і за межамі, дзе яны будуць запатрабаванымі».

Сапраўды, ніякай палітыкі.

Сьвята будзе доўжыцца з 12:40 да 20 гадзінаў 10 верасьня ў Траецкім прадмесьці Менску. Уваход вольны.