Зайцы 2.0 альбо як езьдзіць бясплатна з дапамогай сацыяльных сетак

Нямецкая моладзь вынайшла новы мэтад пазьбяганьня кантралёраў у грамадзкім транспарце. Для гэтай мэты «зайцы» юзаюць сацыяльныя сеткі, дзе папярэджваюць адзін аднаго аб зьяўленьні кантралёраў у транспарце. Мэтад становіцца ўсё болей папулярным у некаторых гарадах, дзе адзін квіток на аўтобус ці трамвай можа каштаваць болей за 2 эўра.

Чальцы Фэйсбук-групы «Гамбургскія транспартныя ўхілісты» прапагандуюць бясплатны праезд. Скарыстацца ім можна праз папярэджаньні адзін аднаго аб зьяўленьні ў аўтобусе або мэтро інспэктара, што правярае квіткі. Некаторыя актывісты нават апісваюць, як выглядаў той ці іншы кантралёр, у акулярах ён быў, ці бяз іх. У выніку чытачы групы могуць у патрэбны момант саскочыць зь цягніка ці іншым чынам пазьбегнуць непрыемнай сустрэчы.

Ініцыятыва ўжо распаўсюдзілася на буйныя нямецкія гарады — Мюнхен, Гамбург, Бэрлін. Мюнхенская група «зайцоў» MVV Blitzer, прадстаўленай у Twitter і Facebook, ужо амаль дасягнула 15 тысячаў сяброў.

Як паведамляе AFP, прадстаўнікі кампаніі грамадзкага транспарту назвалі фэйсбук-ініцыятыву «агіднай», але за продаж квіткоў яны пакуль не турбуюцца. Транспартнікі кажуць, што ў штаце іх кампаній некалькі сотняў інспэктараў і ўсіх адсачыць немагчыма; калегі зь мюнхенскай транспартнай кампаніі MVV дадаюць, што кантралёры так часта і раптоўна перасаджваюцца, што іх паводзіны прадказаць нельга.