Міліцыя вылічвае ўдзельнікаў пратэстаў па фота ў пашпартнай базе?

Зь верагоднасьцю 60% спэцслужбы могуць вылічыць любога ўдзельніка пратэсту праз фота ў пашпартнай базе. Пра новыя мэтады змаганьня зь сеткавымі рэвалюцыямі піша «Салідарнасьць» са спасылкай на крыніцу, блізкую да сілавых структураў.

Адзін зь кіраўнікоў гарадзенскай групы «Рэвалюцыі ў сацыяльнай сетцы» Vkontakte Аляксандр Кузьняцоў сутыкнуўся са спэцслужбамі 12 ліпеня. Да яго зь ператрусам прыйшоў КДБ, хатні кампутар канфіскавалі.

Пасьля ператрусу Аляксандр правёў ноч у ізалятары, а на наступны дзень яго судзілі за ўдзел у акцыі 6 ліпеня. Суд аштрафаваў Аляксандра на мільён рублёў.

«Хаця ў саму сераду мяне ніхто не затрымліваў. Зрэшты, і кіраўніком гарадзенскай групы Vkontakte я быў адзін дзень», — кажа хлопец. Ён лічыць, што візыт сілавікоў зьвязаны з тым, што ён трапіў у кадар у маўклівую сераду, 6 ліпеня.

Фота iss.ru

Як піша «Салідарнасьць», спэцслужбы маглі пазнаць Аляксандр праз адмысловую праграму, якая ўмее «вылічваць» усіх, каго зьнялі на камэру буйным плянам. Пра гэта паведаміла крыніца, блізкая да сілавых структураў.

«Чалавека, які нядаўна рабіў пашпарт, праграма „пазнае“ амаль на 100%», — кажа неназваная крыніца. Паводле яе словаў, матэрыялы відэаздымкі з акцый апрацоўваюцца праграмай, якая аўтаматычна зьвярае асобы, захаваныя на відэа, з фота пашпартнай базы АВІР. На думку суразмоўцы, такім чынам сілавікі пазнаюць да 60% трапіўшых у кадар людзей.