Эўрадэпутат прапануе дадаць да сьпісу неўязных дэканаў і рэктароў

Эўразьвяз вырашыў падкарэктаваць сьпіс неўязных прыхільнікаў беларускага рэжыму. Ініцыятар перагляду сьпісу прапануе дадаць да яго дэканаў і рэктароў устаноў, адкуль адлічалі студэнтаў па палітычных матывах.

«Я перакананы, што гэты сьпіс трэба пашырыць на многія-многія новыя асобы, якія падтрымліваюць рэпрэсіўную палітыку ў Беларусі. Думаю, што трэба ў сьпіс уключыць дэканаў ды рэктараў навучальных устаноў, у якіх пасьля 19 сьнежня, або пры іншых нагодах, адлічвалі студэнтаў», — заявіў у інтэрвію Радыё «Рацыя» дэпутат парлямэнту Марк Мігальскі.

Менавіта зь ініцыятывы гэтага дэпутату ў Брусэлі «заўважылі» памылкі ў сьпісе неўязных у ЭЗ беларусаў, у тым ліку прысутнасьць у ім нябожчыкаў і ўжо незаангажаваных у прапагандзе журналістаў.

Рэктар БДУІР Міхаіл Батура (прамаўляе) прэтэндуе на першае месца ў сьпісе Мігальскага

Паводле дэпутата, санкцыі супраць дэканаў і рэктараў абмяжуюць іх жаданьне катацца на лыжах у Альпах:

«Тыя, хто рэпрэсуюць насельніцтва Беларусі, яе моладзь, павінны апынуцца ў гэтым сьпісе ды страціць магчымасьць катацца на лыжах у эўрапейскіх курортах», — сказаў эўрадэпутат.

Цяпер у сьпісе неўязных знаходзіцца 158 прозьвішчаў, у тым ліку рэктара БДУ Абламейка і былы міністар адукацыі Радзькоў. Пакуль плянуецца толькі скараціць гэты сьпіс на два прозьвішчы, піша EUObserver.

Міністар адукацыі назваў крокі ЭЗ па ўвядзеньні санкцыяў супраць беларускіх адукацыйных чыноўнікаў «цалкам неканструктыўнымі».

Колькасьць адлічаных за ўдзел у сьнежаньскіх пратэстах студэнтаў вырасла да 8 чалавек. Лідэрам па выключэньні студэнтаў стаў БДПУ, на 2-м месцы БДУІР. З БДУ адлічылі пакуль толькі аднаго студэнта.