Лявон Вольскі выступіць у Лёндане

Лявон Вольскі на гэтым тыдні ўпершыню наведае Лёндан. Галоўная мэта візыту — творчая сустрэча, якая адбудзецца 9 кастрычніка.

Сустрэча адбудзецца ў Беларускім доме, які належыць Згуртаваньню беларусаў у Вялікабрытаніі. Падчас імпрэзы лідэр N.R.M і «Крамбамбулі» будзе адказваць на пытаньні гледачоў, сьпяваць песьні і чытаць вершы. Візыт адбываецца па запрашэньні Англа-беларускага таварыства, якое было заснаванае ў 1954 годзе.

«Ідэя запрасіць Лявона ў Англію зьявілася яшчэ гадоў пяць таму, але тады ня было магчымасьці гэта ўсё арганізаваць. Мы вельмі радыя, што зараз гэта атрымалася, — распавядае галава Англа-беларускага таварыства Джым Дзінглі. — Акрамя творчай сустрэчы падчас візыту таксама плянуецца шэраг прыватных сустрэч з прадстаўнікамі беларускай дыяспары і іншыя мерапрыемствы».

Нагадаем, што Лявон Вольскі ў гэтым годзе выдаў адразу некалькі новых дыскаў: навагодні супольны праект «Такога няма нідзе», сольны альбом на вершы беларускіх клясыкаў «Белая яблыня грому», а таксама новы сынгл «Крамбамбулі» «Раз-два-тры — усе за стол!».

Анонс па-ангельску

12:00, 04/10/2010 | Навіны |
Каментары праз FACEBOOK



 
In 0.0565 seconds.