У чацьверты раз на Be2gether

Чацьверты фэстываль музыкі і мастацтваў Be2gether адгрымеў традыцыйна ля замку Нарвілішкес і сабраў болей паўсотні артыстаў з усяго сьвету. Пакуль у Менску ішлі дажджы, надвор’е каля беларускай мяжы ў Літве радавала сьпёкай, ад чаго самай папулярнай вопраткай сталі купальнікі і каляровыя гумовыя боты. Тры дні музыкі, гульняў, прыгодаў ды размоваў з музыкамі беларускімі і замежнымі ў дзёньніку з фэстывалю.

«На „бітугезу“ едзеце?» — ад частасьці гэтага пытаньня напярэдадні фэсту падавалася, што на Be2gether зьедзе добрая частка Менску. Сёлета, як і ў папярэднія гады, беларусы маглі трапіць на фэст у Літве, атрымаўшы шэнген бясплатна. Паехалі цягнікамі, аўтобусамі, аўто, на фэст і міма яго — далей да мора.

У пятніцу па абедзе машынкі зь беларускімі і літоўскімі нумарамі шчыльнымі ланцужкамі сьцякаліся ў «кішэню» на сучаснай літоўскай мапе — да замку Нарвілішкес, з трох бакоў аточанага беларускай мяжою. Там на знаёмых ужо па ранейшых Be2gether зялёных палях раскінулася аграмадная паркоўка, намётавы гарадок ды пляцоўка зь некалькімі вялікімі сцэнамі і колам разнастайных шапікаў зь півам-ежаю.

На ўзвышшы ў замку, які на час фэсту ператвараецца ў віп-зону з кавярняй, падрыхтавалі адмысловы сюрпрыз — настойку падавалі ў кавалках лёду. «Посуду няма з-за крызысу», — жартавалі наведвальнікі. «Такія шклянкі і біць не шкада на радасьцях!» — падхоплівалі беларускія музыкі, якія сёлета выступілі на ўсіх сцэнах фэсту. Беларусь прадстаўлялі CherryVata, Akute, Open Space і Лявон Вольскі. Яшчэ зь дзесятак беларускіх творцаў прэзэнтаваліся ў адмысловых намётах кампаніі «Будзьма» і галерэі «Ў».

Электроншчыкі CherryVata зладзілі пазытыўны мэлядычны выступ на «замкавай сцэне» пад актыўныя танцы прыхільнікаў. Сюрпрызам стаў выступ разам з музыкамі Русі.

«Вельмі люблю nu juzz, гэтую эстэтыку, пераасэнсоўваньне джазу ў электронным варыянце. Ды й не хапае мне з часоў Indiga вось гэтага паху гастрольных бусікаў, калі адзін на адным сядзяць, і трэба недзе наруліць ежы ды знайсьці сабе месца паспаць… Сумую па гэтым!» — распавяла нам пасьля выступу Руся.

Цэлым бусікам прыехаў на Be2gether і Лявон Вольскі з кампаніяй: сьпяваў песьні зь «Белай яблыні грому», весяліў «Крамбамбуляю», прэзэнтаваў народныя песьні ў рокавай апрацоўцы ды сьпяваў па-француску, сабраўшы пад сцэнаю ці ня ўсіх беларусаў на фэсьце.

Выступ Open Space, якія ў першы дзень спрабавалі заінтрыгаваць літоўцаў, разьлепваючы надпісы «Who the fuck are Open Space?», распачаў другі дзень фэсту. Прамоцыя працягнулася раздачай бясплатных дыскаў усім ахвочым, аднак пад сцэнаю затрымліваліся нямногія.

А вось магілёўцы Akute дабіраліся з сапраўднымі рокавымі прыгодамі. — прыйшлося пакінуць аўто ўначы на мяжы, і рушыць зь гітарамі празь плячо на фэст пешшу, аднак іх уначы падхапіў гурт з Расеі. Akute пасьпяхова прэзэнтаваліся на клюбнай сцэне. Хоць канкурэнцыя ў магілёўцаў была сур’ёзная — на іншых пляцоўках у гэты час выступалі папулярныя літоўскія ньюджазмэны Brassbastards ды поп-рокеры Biplan.

Але найперш Be2gether — магчымасьць пабачыць у адным месцы шмат цікавых гуртоў розных стыляў з розных куткоў сьвету. Пабачыць было што! Датчане «Who Made Who», мэлядычныя нарвэгі «Casiokids», вясёлыя ўкраінцы «Гайдамаки», дзёрзкі расейскі Шнур з «Рублём», харызматычныя гішпанцы з танцавальнай музыкай і баскімі этна-матывамі Сrystal Fighters, якія потым захапілі нас расповедамі пра жыцьцё пад адным дахам, брытанскія рэпэры «Roots Manuva», пранікнёная Аліна Арлова, фрыкаватыя і эпатажныя аўстралійцы «Empire of the Sun» ды многія іншыя.

Аглушальнай кропкаю на Be2gether 2010 стаў выступ брытанскіх хэдлайнэраў Skunk Anansie, адноўленых амаль пасьля 10-гадовага перапынку, зь непаўторнай Скін на вакале.

Гнуткая, моцная, дзёрзкая і бязьмежна пазытыўная Скін літаральна ўварвалася на сцэну зь вядомымі гітамі гурта. Публіка выбухнула, калі сьпявачка кінулася ў натоўп і проста пайшла па далонях фэнаў. Напэўна, гэта быў самы магутны выступ з усіх чатырох Be2gether.

Трэці дзень фэсту працягнуўся таксама напоўніцу, але праграма пястрэла пераважна маладымі літоўскімі гуртамі. «Раю застацца паслухаць Freaks on Floor», — падаючы каву тлумачыў гаваркі прадавец-літовец. Аднак машыны зь беларускімі нумарамі ўжо выяжджалі па пыльнай дарозе ў бок Вільні працягнуць адпачынак шопінгам альбо «дагуляць» дзень па візе на Балтыйскім моры.

Музыка розных стыляў, гульні, магчымасьць «пажаніцца» ў намёце, паваляцца ў гразюцы, размаляваць цела ці вопратку, забацаць модную сьмелую фрызуру, паглядзець футбол ці проста таньчыць у адным з музычных намётаў да раніцы. Такім атрымаўся чацьверты Be2gether, які ладзіцца зь ініцыятывы нястомнага літоўскага бізнэсоўца Гедруса Клімкявічуса.

«Музыка бурыць межы!» — узгадваецца першы сьлёган Be2gether. Аптымістычныя мары Клімкявічуса пасьля фэсту 2007 году пабудаваць сцэну над літоўска-беларускай мяжой пакуль ня спраўдзіліся, аднак межы сапраўды крыху пахіснуліся. Сярод гасьцей фэсту пад гукі сьпеваў Лявона Вольскага нясьпешна прагульваўся беларускі амбасадар у Літве ў кампаніі свайго літоўскага калегі.

«Ну распавядайце, як там аўстралійцы выступілі, як Skunk Anansie, а нашы як?» — сустрэлі нас па дарозе назад зацікаўленыя і ўсхваляваныя беларускія памежнікі. «Усё было супэр! Стомленыя, уражаныя, адпачыўшыя і загарэлыя, але ўжо чакаем юбілейнага Be2gether — пятага!»