Беларускія ВНУ зноў ня трапілі ў Tоп-200 найлепшых унівэрсытэтаў сьвету

І калі б толькі ў Tоп-200, нават у лепшыя 400 вышэйшых навучальных устаноў сьвету беларускія ВНУ сёлета не трапляюць. Між іншым, у Tоп-400 прабіліся 3 расейскія ўнівэрсытэты і два польскія. Лепшыя пазыцыі традыцыйна захавалі амэрыканскія і брытанскія ВНУ.

Рэйтынг лепшых вышэйшых навучальных устаноў сьвету штодзёньнік Times Higher Education публікуе з 2004 году. І штогод у ім дамінуюць адны і тыя ж ВНУ. Гэта Гарвардзкі (ЗША) і Кэмбрыджскі ўнівэрсытэты, якія занялі адпаведна першую і другую пазыцыю ў рэйтынгу за 2009 год.

Агулам першыя 16 пазыцый традыцыйна акупавалі амэрыканскія да брытанскія ўнівэры. Аднак пазыцыі ЗША як унівэрсытэцкай супэрдзяржавы выглядаюць ня так пераканаўча, як тое было ў папярэднія гады. На пяты амэрыканскім ВНУ наступаюць азіяцкія ўнівэры: у сьпісе двухсот лепшых іх ужо 32.

Сярод беларускіх суседзяў толькі Расея і Польшча могуць пахваліцца прысутнасьцю ў сьпісе. МДУ на 155 месцы, а Санкт-Пецярбургскі дзяржаўны ўнівэрсытэт на 168. Польскія ўнівэрсытэты ня трапілі ў Топ-200, але Ягелонскі (302) і Варшаўскі (349) ўнівэрсытэты трапілі ў чацьвёртую сотню рэйтынгу.

У час складаньня сьпісу ўлічваліся такія паказчыкі, як колькасьць згадваньня ВНУ акадэмічнай супольнасьцю, колькасьць замежных студэнтаў, суадносіны ліку супрацоўнікаў і студэнтаў ВНУ. Дасьледчыкі апрацавалі меркаваньні 9386 навукоўцаў і 3281 працадаўцаў нядаўніх выпускнікоў.