Зьміцер Вайцюшкевіч і WZ-Orkiestra дадуць вялікі клюбны канцэрт

30 красавіка Зьміцер Вайцюшкевіч і WZ-Orkiestra адыграюць вялікі клюбны канцэрт у «Гудвіне». «Падрыхтоўка да летніх open-air’аў», — апісвае фармат імпрэзы Вайцюшкевіч.

Ня так даўно Вайцюшкевіч вярнуўся зь Японіі, дзе прэзэнтаваў свой беларуска-японскі праект «Месяц і Сонца».

«Яны вельмі ўважліва слухаюць, — адзначае Зьміцер. — У гэтым японцы падобныя да кансэрватыўнай беларускай публікі — мы вельмі стрыманыя ў сваіх эмоцыях. І зараз мы вырашылі гэта выпраўляць!»

Свае клюбныя канцэрты Вайцюшкевіч называе «музычным разьняволеньнем».

«Шчыра кажучы, нам надакучае выступаць у канцэртных залях. Адчуваецца, што нашым слухачам становіцца няўтульна ў сваіх мяккіх крэслах — ім хочацца таньчыць і весяліцца».

У апошні час Зьміцер не хавае сваёй сымпатыі да клюбнага фармату і рок-музыкі. Апошні альбом Вайцюшкевіча і WZ, напісаны на вершы Генадзя Бураўкіна, самае яркае таму пацьверджаньне. Менавіта ў «Лірыцы» можна назіраць пераход музыкаў ад world music і гарадзкога раманса да рока.

«Нашым прыхільнікам ня варта хвалявацца. Мы адыграем шмат старога і любімага. Аднак будуць і прэм’еры — песьні на вершы польскага паэта Рафала Воячэка, напрыклад. Менавіта над гэтым альбомам мы цяпер і працуем».

Зараз вядуцца перамовы аб удзеле WZ-Orkiestra у фэстывалі «Басовішча». Для музыкаў гэта стане сапраўдным прарывам, улічваючы музычны фармат фэсту.

А свой красавіцкі канцэрт Вайцюшкевіч назваў «падрыхтоўкай да летніх open-air’аў».

«Хочацца больш сонца, сьвежага паветра і мноства людзей вакол, — кажа музыкант. — Няхай усе таньчаць, весяляцца і рыхтуюцца да доўгіх летніх дзянькоў і мора добрай музыкі. Прыходзьце! Абяцаем шмат пазытыва, драйва і выдатнага настрою».