Ківач Фуко

Інфармацыя пра гурт, падрыхтаваная ўдзельнікамі каманды:

Гурт «Ківач Фуко» нарадзіўся 16 чэрвеня злашчаснага 2006 году, ажыцьцявіўшы такім чынам прынамсі адну пазытыўную падзею глябальнага маштабу.

Як і любы жывы арганізм, гурт ня мог нарадзіцца зь нічога. Ягоны эмбрыён выношваўся доўга і клапатліва, аточаны любоўю і пяшчотай.

Творчыя рэсурсы гурта выцякаюць зь неўтаймаванага таленту Зьміцера Казлоўскага. Гэты апантаны майстар струны і вакалу досыць працяглы час выступаў у якасьці барда на шматлікіх вечарынах, сустрэчах, канцэртах па ўсёй Беларусі, Украіне і Польшчы (у тым ліку і на «Бардаўскай восені»), і нават запісаў свой дэма-альбом. Але з прычыны відавочнай рокавасьці ягоных тэкстаў і музыкі (хай сабе пад адну гітару) яго нават называлі – ня будзем сьціплічаць – беларускім Бобам Дыланам.

Пасьля такіх заяваў стварэньне гурта было толькі пытаньнем часу.

Свае «ударныя» паслугі адразу ж прапанавала Кася Бохан (гурты «я і джынджэр», «Жаба ў каляіне»). Неўзабаве сэрцы ўдзельнікаў «Ківача Фуко» былі навечна заваяваныя басісткай Стэфаніяй Анемпадыставай. А трохі пазьней да гурту далучыўся і Джымі Хендрыкс з суседняга пад’езду Аляксей Казлоўскі.

З тога часу гурт пачаў імкліва разьвівацца, вытрымаўшы некалькі кватэрнікаў, дачнікаў і гаражнікаў і перажыўшы безьліч так званых «канцэртаў» для сяброў на рэпэтыцыях. Суседзі па гаражах нават прэзэнтавалі гурту дзьве 50-ватныя калёнкі. Маўляў, калі цыркулярка працуе, песень не чуваць. Пасьля такога матар’яльна падмацаванага камплімэнту «Ківач Фуко» узяўся за справу зь яшчэ большым імпэтам, адчуўшы, што справа гэтая будзе жыць і зьмяняць наш недасканалы сьвет у лепшы бок.

На жаль, гурт пасьпеў зрабіць толькі адзін запіс, але ёсьць ужо дастаткова матар’ялу для альбому, і нават трохі застанецца на потым.

Мяркуючы па тым, што падчас выступаў ніхто не памёр, а фізіяноміі удзельнікаў ня зьведалі пратухлых яек і гнілых памідораў, спадзяемся, што гурт не безнадзейны і парадуе Вас, прынамсі, ня менш за нас саміх.

Склад:

• Зьміцер Казлоўскі - гітара, вакал
• Аляксей Казлоўскі - гітара
• Стэфанія Анемпадыстава - бас-гітара
• Кася Бохан - бубны
  

Трэк:

• Служкі чорных зораў (mp3, 4.3Mb)