Рэдкія беларускія словы з’явяцца ў Facebook

У Фэйсбуку з’явілася старонка «Беларускае слова штодня», на якой пачынаючы з 22 снежня будуць штодзень з’яўляцца рэдкія альбо добра забытыя беларускія словы з тлумачэннем і спасылкай на крыніцу (слоўнік, навуковы артыкул).

«Ідэя з’явілася спантанна. Я параўноўваў сітуацыю носбітаў беларускай мовы ў Беларусі да расейскай і польскай у гэтых краінах. Яны вывучаюць свае мовы ў штодзённым ужытку, цалкам натуральна і не напружна. А ў нас так не бывае, бо беларуская мова ў Беларусі мае іншы статус і ўмовы функцыянавання. Беларуская мова не выкладаецца належным чынам у ВНУ, пра школы я ўжо не кажу, дык беларускамоўным практычна заўжды даводзіцца давучвацца. Праблема ў тым, што месцаў такога давучвання амаль няма, не кажучы ўжо пра тое, што не заўжды чалавек можа сам акрэсліць, ці добрую ён знайшоў крыніцу ведаў», — кажа заснавальнік праекту Аляксандр Навіцкі.


Толькі за першыя выходныя ініцыятыву, якая пачне працу праз два тыдні, упадабала амаль 200 чалавек

Адукацыйны праект «Беларускае слова штодня» разлічаны на год, калі ён акажацца паспяховым, то магчыма Аляксандр, які з’яўляецца яшчэ і ўладальнікам перакладніцкай фірмы, працягне яго. Ён ужо запраграмаваў большую частку словаў, якія будуць з’яўляцца на старонцы вядомай сацыяльнай сеткі. Усе рэдка ўжываныя словы Аляксандр абіраў самастойна са слоўнікаў. 

«Нармальным людзям і ў галаву не прыйдзе сесці і гартаць слоўнікі, а для такіх "ненармальных", як я, гэта частка жыцця і працы. Я шмат гадоў займаўся рэдактарскай працай на радыё, тэлевізіі і ў маёй уласнай фірме, таму выдатна знаёмы з "актывам" журналістаў і перакладчыкаў (а гэта тыя людзі, якія абавязаныя ведаць мову лепей за звычайных людзей), і прыблізна ўяўляю, якая лексіка ў нас актыўная, а якая — не».

Каментары праз FACEBOOK



 
In 0.1873 seconds.