«Арт-сядзіба» адкрываецца яшчэ раз

Чарговая «Арт-сядзіба» размясцілася ў былым будынку амбасады Румыніі амаль у самым цэнтры Менску. Гэта ўжо трэцяе памяшканне знакамітай культурнай пляцоўкі. Папярэдніх двух «Арт-сядзіба» пазбавілася з-за дагэтуль незразумелых прычынаў. Аднак каманда, якая мяркуе паўтарыць поспех першай сядзібы, настроена пазітыўна.

«Добра, што ўвесь гэты хлам не паспелі перавезці», — Павал Белавус у чорнай куртцы з пашарпаным крэслам у адной руцэ і штатывам у іншай дзеліцца ўражаннямі пра некалькі дзён працы папярэдняй «Арт-сядзібы». Тады культурная пляцоўка не паспела правесці ніводнага мерапрыемства пасля таго, як публікацыя аб яе адкрыцці на новым месцы з’явілася на Generation.by. За дзень да канцэрту Лявона Вольскага, што мусіў афіцыйна адчыніць пляцоўку недалёка ад станцыі метро «Пушкінская», арт-сядзібаўцы пабачылі пломбы на дзвярах памяшкання.

Цяпер тая ж самая каманда, што і два месяцы таму натхнёна рыхтавала да адкрыцця «Арт-сядзібу-2», не менш энергічна выгружае з фургону небагатую маёмасць культурных менеджэраў: у цемры вока чапляецца за некалькі крэслаў, кампутарны стол ды матрац.

«Мы ж сапраўдныя беларусы: калі робім справу, то робім яе да канца, — кажа Павал Белавус пра трэцюю спробу адкрыць «Арт-сядзібу».

Яшчэ некалькі год таму сам Павал Белавус, які нават не ўяўляў, што стане знакамітым як адзін са стваральнікаў «Арт-сядзібы», прыходзіў у гэты двухпавярховы будынак дзіцячага садку з дакументамі на румынскую візу. Цяпер пра дыпламатычную ўстанову нагадвае хіба што будка міліцыянта на ўваходзе ды іржавы флагшток, на якім даўно ўжо няма ніякага сцягу. 75 квадратных метраў з аднаго вялікага і некалькіх прахадных пакояў у 10 хвілінах ад станцыі метро «Фрунзенская» і праспекту Пераможцаў — неблагое месца для ўстановы, падобнай для «Арт-сядзібы».

«Здаецца, выдатнае памяшканне для розных імпрэзаў, літаратурных сустрэчаў, прэзентацый, курсаў. Мы яшчэ ўладкуем яго, дадамо нейкай нефармальнасці. Спадзяемся, што яно будзе не менш папулярным, чым пляцоўка на заводзе „Гарызонт“, — раптам Павал Белавус усхопліваецца і падбягае да адной з сценак буйнейшага з трох памяшканняў новай „Арт-сядзібы“.

«А тут можна ж кіно паказваць!» — ён у думках вымярае неабходную для праектара плошчу і адлегласць ад сцяны, на якую яго трэба ставіць.

У адносна невялікім пакойчыку заводу «Гарызонт» за 8 месяцаў працы «Арт-сядзіба» паспела правесці дзясяткі сустрэчаў з вядомымі музыкамі, мовазнаўцамі, гісторыкамі. У ліпені 2012 году беларускамоўная прастора пазбавілася магчымасці арэндаваць памяшканне, як мяркуюць яе стваральнікі, у сувязі з тым, што права на выступ у «Арт-сядзібе» мог атрымаць кожны.

Аднак і на трэцяй спробе ўпарты Белавус не збіраецца змяняць задачы пляцоўкі: «Прасоўваць сучасную беларускую незалежную культуру. Праўда, з улікам абставінаў, у якіх мы жывем».

«Я хачу падкрэсліць: мы цалкам непалітычны праект. Мы грамадска-культурная пляцоўка. Наша мэта: падвышаць узровень культуры і моладзевай актыўнасці», — кажа Павал Белавус.

Праз дзень пасля заключэння дамовы на арэнду памяшкання да Паўла ўжо пачалі звяртацца творцы, што жадаюць арганізаваць нейкую падзею ў «Арт-сядзібе». Нехта хоча правесці літаратурную сустрэчу, нехта прэзентацыю, а хтосьці гатовы арганізаваць моўныя курсы.

Зрэшты, арт-сядзібаўцы пакуль не вызначыліся з тым, якім мерапрыемствам адкрыюць культурную пляцоўку:

«24 снежня „Арт-сядзібе“ споўніцца год. У мінулым годзе мы адкрываліся канцэртам Паліны Рэспублікі. Спадзяемся, і ў гэтым годзе якое мерапрыемства на гадавіну зладзім», — кажа Павал. Акрамя гэтага хлопцы збіраюцца зладзіць «арт-сядзібны» марафон у Чырвоным касцёле, на якім выканаўцы па-беларуску заспяваюць на Каляды.

«Пра першыя вечарыны інфармацыя з’явіцца на наступным тыдні. Галоўнае зараз заехаць і нагадаць гэтаму памяшканню патрэбны выгляд».

Арт-сядзіба версія №3

Фота: Юра Сідун

Каментары праз FACEBOOK



 
In 0.0742 seconds.