Ці вернуць студэнтам бясплатны праезд? Улады вырашаць у жніўні

Бясплатны праезд у грамадзкім транспарце Менска для школьнікаў і студэнтаў адменяць ужо з 1 чэрвеня, а рашэньне аб магчымым яго вяртаньні з восені прымуць у жніўні з улікам «інтарэсаў усіх слаёў насельніцтва». Аб гэтым заявіў мэр Мікалай Ладуцька.

Ужо зь першага летняга дня студэнтаў і школьнікаў Менска пазбавяць права езьдзіць у грамадзкім транспарце бясплатна. Мэр сталіцы Мікалай Ладуцька тлумачыць гэта вакацыямі ў школьнікаў і ад’ездам студэнтаў з гораду.

Ладуцька ўпершыню прызнаў, што ўвядзеньне бясплатнага праезду для школьнікаў і студэнтаў супала зь «цяжкім пэрыядам»:

«Калі мы ў мінулым годзе пайшлі на гэты крок [бясплатны праезд], мы сказалі, што гэта не на стагодзьдзі вечныя, а як элемэнт сацыяльнай падтрымкі ў цяжкі пэрыяд», — цытуе мэра БелТА.

Як выглядае па рыторыцы ўладаў, яны б з радасьцю назаўжды пазбавіліся ад такога «элемэнту сацыяльнай падтрымкі»:

«Скончацца вакацыі, у жніўні мы яшчэ раз зьбярэмся, абмяркуем, усе разам узважым і прымем рашэньне, як будзем дзейнічаць далей, каб яно адпавядала і інтарэсам гораду Менска, і ўсіх сацыяльных слаёў насельніцтва», — паведаміў Мікалай Ладуцька.

Паводле папярэдніх заяваў кіраўніцтва мэтрапалітэну, да траціны ўсіх пасажыраў у мэтро езьдзяць бясплатна. Збольшага гэта студэнты. Напрыклад, на станцыі «Барысаўскі тракт» 40% пасажыраў — студэнты. Таму чыноўнікі вырашылі залатаць дзіркі ў гарадзкім бюджэце двума шляхамі: падвышэньнем тарыфаў (верагодна, таксама зь лета) і адменай бясплатнага праезду.

Раней мэр Менску ўжо двойчы казаў пра тое, што студэнты будуць езьдзіць за грошы зь лета. Мінулым разам ён прапанаваў навучэнцам зарабіць на аплату праезду ў атрадах БРСМ.

Гэтым разам Ладуцька сказаў, што для часовага працаўладкаваньня моладзі будуць прадстаўленыя дадатковыя працоўныя месцы.