У Беларусь не вярнуліся дзьве траціны выпускнікоў ЭГУ

Выпускнікі ЭГУ не сьпяшаюцца вяртацца на радзіму. Толькі чацьвёртая частка сёлетніх выпускнікоў гэтай унікальнай беларускай навучальнай установы наважылася застацца ў Беларусі. Некаторыя знайшлі працу ў бізнэсе, а 10% увогуле аказаліся беспрацоўнымі. Аб гэтым сьведчаць дадзеныя апытаньня большай паловы выпускнікоў ЭГУ.

Як сьведчаць дадзеныя апытаньня выпускнікоў бакаляўрскіх праграмаў, што апублікаваныя на сайце студэнцкай супольнасьці ЭГУ, 64% студэнтаў Эўрапейскага гуманітарнага ўнівэрсытэту, што скончылі навучаньне ў 2011 годзе, не вярнуліся ў Беларусь.

Паводле апытаньня 92 са 151 выпускніка бакаляўрыяту ЭГУ 2011 году

На радзіме толькі чацьвёртая частка выпускнікоў адзінага беларускага ўнівэрсытэту, які жыве па правілах Балоньскай сыстэмы.

Каля 37% чалавек, якія атрымалі ступень бакаляўра ў ЭГУ, працягваюць навучаньне ў магістратурах вышэйшых навучальных устаноў за межамі Беларусі. Зь іх 10% сумяшчаюць вучобу і працу.

Тыя ж, хто вярнуўся ў Беларусь, збольшага занятыя ў сфэры прыватнага бізнэсу. Але ёсьць і такія ЭГУшнікі, хто ўладкаваўся ў дзяржаўныя ўстановы, пераважна культурныя альбо адукацыйныя. Пры гэтым 10% так і ня здолелі знайсьці ніякай працы.

Паводле апытаньня 92 са 151 выпускніка бакаляўрыяту ЭГУ 2011 году

Апытаньне ахапіла толькі 92 выпускнікоў, што ў гэтым годзе скончылі ўнівэрсытэт.

Агулам у ліпені 2011 году дыплём ЭГУ атрымалі 151 выпускнік бакаляўрскіх і 38 выпускнікоў магістэрскіх праграмаў. Такім чынам, колькасьць выпускнікоў унівэрсытэту за час яго знаходжаньня ў Вільні павялічылася да 667 чалавек.

Вяртацца ў Беларусь расхацелася

Многія з гэтых выпуснікоў ЭГУ не вярнуліся ў Беларусь. Фота students.ehu.lt 

Два гады таму сытуацыя зь міграцыяй былых студэнтаў ЭГУ была абсалютна іншай. Паводле словаў кіраўніцтва ўнівэрсытэту, у 2009 годзе 17% яго выпускнікоў знаходзіліся па-за межамі Літвы і Беларусі, і цэлых 45% выпускнікоў бакаляўрыяту працавалі ў Беларусі.

Пры гэтым палова выпускнікоў, якія былі занятыя на радзіме, працавалі ня толькі ў прыватным сэктары, але і ў НДА альбо нават дзяржаўных ВНУ.

У апытаньні ЭГУ удзельнічалі 62% выпускнікоў бакаляўрскіх праграмаў.