У першую чаргу студэнтаў БДУ будуць разьмяркоўваць на дзяржпрадпрыемствы

Пры разьмеркаваньні выпускнікоў Беларускага дзяржаўнага ўнівэрсытэту ў першую чаргу будуць задаволеныя заяўкі дзяржаўных арганізацый, заявіў рэктар унівэрсытэту Сяргей Абламейка. Таксама ён назваў лічбу студэнтаў, якія могуць разьлічваць на вольны дыплём.

Разьмяркоўваць студэнтаў БДУ будуць у незалежнасьці ад наяўнасьці лістоў-запрашэньняў ад недзяржаўных працадаўцаў. У першую чаргу ўнівэрсытэт задаволіць заяўкі ад дзяржаўных арганізацый. Толькі пасьля гэтага будуць разглядацца лісты ад іншых патэнцыяльных працадаўцаў. Аб гэтым заявіў рэктар Беларускага дзяржаўнага ўнівэрсытэту Сяргей Абламейка.

Паводле рэктара, цяпер на факультэтах ВНУ праходзяць папярэднія разьмеркаваньні. З 12 красавіка па 11 траўня адбудуцца пасяджэньні пэрсанальных камісій па разьмеркаваньні студэнтаў. Аб гэтым паведамляюць naviny.by.

«Цяпер да нас паступаюць заяўкі з розных міністэрстваў, ведамстваў, арганізацый, — паведаміў рэктар. — Заявак паступае шмат, ня менш, чым у мінулым годзе».

Паводле Абламейкі, пазьбягаюць прымусовага разьмеркаваньня меней за 5% выпускнікоў БДУ.

Болей за 3 тысячы выпускнікоў з 21 тысячы, што мусілі быць разьмеркаванымі ў мінулым годзе, здолелі гэтага пазьбегнуць.