Вакаліст IQ48 зламаў пятку

Саша Ракавец цяпер у гіпсе і на рарытэтных мыліцах. Так музыка правядзе два месяцы, у час якіх заплянаваныя выступы гурта ў Беларусі і Польшчы, а таксама запіс трэцяга альбому IQ48. Няўдалае «прызямленьне» здарылася з Ракаўцом на лецішчы ў сябра па музычным цэху.

«Гляджу сэрыялы, чытаю кнігі», — распавядае Саша пра вымушанае баўленьне часу. Да гіпсу і абмежаваных рухаў музыкант прызвычайваецца ўжо трэці дзень, а заадно думае пра якую-небудзь працу «на даму».

У суботу музыкі выступілі ў «Графіці», у нядзелю Ракавец зь сябрамі паехаў у госьці на лецішча, а на раніцу панядзелка ўсё і здарылася.

«Пераскокваў засьнежаную рачушку, прызямліўся і… усё зразумеў», — узгадвае той дзень музыкант.

Адтуль сябры павезьлі траўмаванага Сашу ў Менск у шпіталь. Уражаньняў ад чэргаў і настрояў у траўматалёгіі можа хапіць на цэлы вострасацыяльны альбом. Аднак хіба пазьней. Трэці альбом IQ48 акурат напісаны, і музыкі прыступаюць на запісу на студыі. «Будзем па чарзе вазіць Санька на запіс», — падтрымлівае калегу гітарыст Яўген Бузоўскі. Цяпер Ракавец болей хвалюецца за канцэрты, на якіх прызвычаіўся да актыўных рухаў. Зараз музыкі рыхтуюцца да выступу на трыб’юце Neuro Dubel у Менску і канцэрту ў Варшаве.

«Падбяру якое барнае крэсла», — разважае Саня, як сумясьціць гіпс і сцэну.

Мыліцы ў Ракаўца, дарэчы, рарытэтныя. Перайшлі «ў спадчыну» ад музыканта Сяргея Скрыпнічэнкі, які адхадзіў са зламанай нагой не адзін месяц. Будзем спадзявацца, надалей гэтыя мыліцы ня будуць працягваць сваю «музычную кар’еру».