Міністр адукацыі: «Плата за адукацыю натуральна будзе змяняцца»

Летні рост коштаў на адукацыю, які назвалі рэкордным, можа апынуцца не апошнім у гэтым годзе. Міністр адукацыі Сяргей Маскевіч заявіў, што ўніверсітэты падвысяць цэны як толькі вырастуць заробкі выкладчыкаў. Апошнія плануецца узняць ужо ў наступным месяцы.

«Плата за навучанне вызначаецца расходамі ўстановы адукацыі на падрыхтоўку спецыяліста. І яна будзе натуральна змяняцца, калі будуць змяняцца расходы», — сказаў міністр адукацыі Сяргей Маскевіч у інтэрв’ю БТ на пытанне аб магчымасці новага росту коштаў на адукацыю.

«Будуць змяняцца цэны на паслугі, будзе змяняцца стаўка першага разраду, натуральна, установа адукацыі абавязаная выплачваць заробак», — заявіў у іншым інтэрв’ю Маскевіч.

Са словаў міністра вынікае, што новы рост коштаў не за гарамі. Адбыцца ён можа ўжо ў кастрычніку. На гэты месяц запланаванае чацвёртае падвышэнне стаўкі першага разраду — велічыні, што вызначае памер заробкаў бюджэтнікаў.

Апошняе падвышэнне стаўкі адбылося 1 верасня, хаця яно чакалася яшчэ ў жніўні. Рыхтуючыся да гэтай даты, ВНУ літаральна за некалькі дзён да сканчэння прыёму дакументаў на бясплатныя аддзяленні выставілі на сайтах новыя адукацыйныя цэны. Лічбы тады шакавалі многіх абітурыентаў: рост у некаторых універсітэтах сягаў за 50%.

Да прыкладу, у Беларускім дзяржаўным універсітэце інфарматыкі і радыёэлектронікі кошты на навучанне выраслі амаль 50%. Студэнты найбольш прэстыжных штогод будуць плаціць лічбу з вялікай колькасцю нулёў: 14 700 000 беларускіх рублёў ці 1 770 амерыканскіх даляраў. Троху болей плацяць эканамісты і юрысты на першым курсе БДУ.

75%

Сяргей Маскевіч сцвярджае, што поўны кошт навучання студэнта ў беларускіх ВНУ не перавышае 20 млн. рублёў. Атрымліваецца, што студэнты-платнікі найбольш папулярных спецыяльнасцяў у незалежнасці ад накірунку аплочваюць каля 75% расходаў на адукацыю, а не 50%, як Сяргей Маскевіч і іншыя чыноўнікі заяўлялі не раз.