Мінадукацыі: «Знамя Юнацтва» і «Зорка» «карыстаюцца вялікім попытам» за мяжой

Намесьнік міністра адукацыі не ўяўляе студэнта без айпаду, таму патрабуе он-лайн вэрсій дзяржаўнай прапаганды

«Нашы газэты і часопісы для дзяцей і моладзі карыстаюцца вялікім попытам на рынках краін СНД», — аб гэтым распавялі чыноўнікі на калегіі Міністэрства адукацыі, перадае БТ.

Аднак і удасканальваць ёсьць што: чыноўнікі лічаць, што экспарт беларускіх друкаваных выданьняў можна яшчэ павялічыць. Прыцягнуць у выдавецкі працэс плянуюць нават пераможцаў навучальных алімпіядаў.

Акрамя гэтага, у Беларусі выходзіць болей за паўсотні ўнівэрсытэцкіх выданьняў. Пра іх за мяжой яшчэ ня ведаюць, што таксама нельга пакідаць без рэакцыі:

«Сёньня цяжка ўявіць студэнта без айпаду, нэтбуку», — лічыць намесьнік міністра адукацыі Віктар Якжык. Ён заклікаў ВНУ разьвіваць электронныя вэрсіі студэнцкіх газэт.