24-гадовая дзяўчына-хакер са Швэцыі стала самай маладой дэпутаткай Эўрапарлямэнту

Эмілія Андэрсдотэр 1987 году нараджэньня была выбраная дэпутаткай Эўрапейскага парлямэнту ад Пірацкай партыі яшчэ два гады таму, але з-за бюракратычных перашкодаў здолела атрымаць мандат толькі цяпер. 24-гадовая швэдзкая студэнтка стала самай маладой дэпутаткай.

Бяз гальштуку: самая маладая дэпутатка Эмілія Андэрсдотэр вымушаная была кінуць унівэр дзеля крэсла ў парлямэнце. Фота TorrentFreak

Да абраньня ад Швэцыі ў Эўрапейскі парлямэнт, Эмілія была студэнткай матэматычнага факультэту. Цяпер у яе ёсьць уласны офіс у Брусэлі і шмат плянаў па зьменах у тэлекамунікацыйным заканадаўстве ЭЗ.

Дзяўчыну абурае тое, што два гады яна не магла заняць свайго крэсла ў Эўрапарлямэнце. Найперш з-за таго, што такога папросту не існавала: новыя пагадненьні, падпісаныя ў год выбараў, дазволілі павялічыць колькасьць дэпутатаў ад Швэцыі ў Эўрапарлямэнце, аднак спатрэбіўся час для іх рэалізацыі.

Трапіўшы ў парлямэнт, Эмілія абяцае засяродзіцца на тэлекамунікацыйных пытаньнях, а таксама на свабодзе доступу ў Сеціве і прыватнасьці ў ім, піша Euobserver.

Дарэчы, швэдка — не адзіная прадстаўніца Пірацкай партыі ў заканадаўчым органе Эўрапейскага зьвязу. У гэтай досыць нетрадыцыйнай партыі таксама ёсьць нямецкі дэпутат (хаця акрамя Швэцыі і Нямеччыны партыя інтэрнэт-піратаў, што ўтварылася праз узмацненьні патрабаваньняў да распаўсюду пірацкага кантэнту ў Інтэрнэце, існуе і ў некаторых іншых эўрапейскіх краінах).

У Эўрапарлямэнце 736 дэпутатаў, якія выбіраюцца ў 27 краінах-чальцах Эўрапейскага Зьвязу. Орган хоць і мае пэўныя функцыі, але па сваім уплыве на палітыку ЭЗ непараўнальны зь яго ўрадам — Эўрапейскай камісіяй. Наступныя выбары ў Эўрапарлямэнт адбудуцца ў 2014 годзе.