Міхалок заклікае ўсіх добрых людзей гадаваць вусы ў процівагу «вусатаму злу»

Лідэр «Ляпіса Трубяцкога» ініцыюе грамадзкую кампанію «Вернем вусам годнасьць!». Міхалок адгадаваў вусы сам і заклікае браць зь яго прыклад усіх людзей добрай волі. У сваім звароце музыкант дзеліць вусатых на станоўчых і злыдняў, а таксама канстатуе прыватызацыю вусоў усялякімі мянтамі, сілавікамі ды іншымі сатрапамі. Першы вялікі збор усіх добрых вусачоў на чале зь Міхалком намячаецца ў навагоднюю ноч у Маскве.

«Па маім перакананьні, вусы — гэта сакральныя арэлі паміж дабром і злом», — тлумачыць Міхалок. — У гісторыі чалавецтва, а таксама ў сусьветнай культуры, было шмат станоўчых вусачоў: Д’Артаньян, Альбэрт Эйнштэйн, Марк Твэн, Марцін Лютэр Кінг, Махатма Гандзі… У той жа самы час, было і нямала злыдняў, якія таксама насілі вусы: Гітлер, Сталін, Садам Хусэйн, Муамар Кадафі. Вусатыя героі і нягоднікі адзін аднаго неяк ураўнаважвалі. Але ў апошнія гады заўважаецца тэндэнцыя, калі вусы практычна прыватызаваныя не самымі прыемнымі асобамі: мянтамі, сілавікамі, чыноўнікамі, усякага роду сатрапамі.

Таму я заклікаю ўсіх людзей добрай волі: давайце адрошчваць вусы! Бо вусы — гэта ні ў якім разе не рудымэнт зь мінулага. Гэта фільтр, баявы шчыт! У льва, у маржа ёсьць вусы і ім не прыходзіць у галаву іх галіць. Я заяўляю: галіць вусы для мужчыны — гэтак жа ганебна, як галіць ногі ці грудзі.

Я асабіста адгадаваў вусы і, нягледзячы на насьмешкі з боку некаторых родных і блізкіх, лічу іх прыкметай свайго ваяўнічага духу. Чым больш вусатых людзей будзе хадзіць на канцэрты гурта «Ляпіс Трубяцкой», тым магутней будзе наша братэрства!

Сябры, давайце не аддамо вусы на водкуп нягоднікам! Вернем вусам годнасьць!

P. S. Мода на бараду, якую ўвялі папы і хіпсьцеры, ніякага дачыненьня да мужнасьці ня мае. Барада, як правіла, хавае бязвольны падбародак і друзлыя шчокі. Таму насіць бараду — нягожа, так што я цалкам падтрымліваю Пятра I, які прымушаў сваіх падданых галіць бароды.

P. P. S. Некаторыя прадстаўнікі нетрадыцыйных поглядаў на жыцьцё і ўсякая мажарня спрабуюць зрабіць са сваімі вусамі нешта гэтакае, нетрадыцыйнае, выстрыгаюць іх хітрым чынам, накручваюць, робяць ўзоры. Гэта таксама не вітаецца, паколькі вусы павінны расьці, як бог даў. Толькі ў гэтым выпадку яны захоўваюць свой мужчынскі пачатак».

Добрае «войска» на чале з вусатым Міхалком зьбярэцца ў апошні дзень году ў Маскве — на сьвяткаваньні Новага году па-беларуску ў клюбе PIPL. Там будуць «Ляпіс Трубяцкой», «Крамбамбуля», PomidirOFF, DJ Papa BO. Па ідэі, усе будуць вусатыя.