Міністэрства адукацыі зэканоміць на студэнтах

Міністэрства адукацыі абвясьціла аб плянах скарачэньня выдаткаў за кошт зьменаў навучальных плянаў, двухразовага скарачэньня набору на спэцыяльнасьці і скарачэньню пэрсаналу. Таксама міністэрства зьбіраецца заахвочваць ВНУ да здабываньня грошай на баку.

Скарачэньне выдаткаў на адукацыю, верагодна, адчуюць ня ўсе навучэнцы

Аб скарачэньні ў гэтым навучальным годзе выдаткаў на суму 12.7 мільярды рублёў за кошт зьменаў у навучальных плянах і праграмах, верагодных скарачэньняў супрацоўнікаў і іншых шляхоў заявіў намесьнік міністра адукацыі Барыс Іваноў.

Як перадае БелаПАН, таксама Мінадукацыі верагодна скароціць на 50% наборы на тыя спэцыяльнасьці сярэдніх спэцыяльных навучальных установаў, выпускнікі якіх пасьля атрыманьня адукацыі ўладкоўваюцца на нізкакваліфікаваныя пасады.

Некаторыя выпускнікі, атрымліваючы дыплём аб заканчэньні ССНУ, вымушаныя разьмяркоўвацца на спэцыяльнасьці, якія маглі б займаць, скончыўшы ПТВ. Як лічыць Барыс Іваноў, трэба пераарыентаваць навучальныя пляны пад запыты, а не выпускаць спэцыялістаў з сярэдняй спэцыяльнай адукацыяй для прадпрыемстваў, якім патрэбныя працоўныя з прафэсійна-тэхнічнай адукацыяй.

«Выпускаць спэцыялістаў, незапатрабаваных на прадпрыемствах, мы ня маем права, неабходна правесьці аптымізацыю тэрмінаў навучаньня і скараціць навучальныя пляны ў сярэдніх спэцыяльных і прафэсійна-тэхнічных навучальных установах», — цытуе словы намесьніка міністра прэс-служба Мінадукацыі.

У ССНУ і ПТВ будуць зьменшаныя гадзіны факультатыўных і клясных заняткаў.

Раней Міністэрства ўжо казала аб тым, што ўзмоцнена шукае шляхі паступленьня дадатковых прыбыткаў, найперш валютных. З гэтага навучальнага году замежнікаў абавязалі плаціць за беларускую адукацыю выключна ў валюце. Беларускія ж студэнты будуць болей выдаткоўваць на інтэрнаты: за «добрыя» пакоі плаціць прыйдзецца прыкладна ў шэсьць разоў болей, чым цяпер.

Агулам у 2011 годзе дзяржава плянавала патраціць на адукацыю 2.1 трыльёны рублёў, зь іх 1.5 трыльёны — на вышэйшую адукацыю. Такім чынам, меркаваная эканомія ў 12.7 мільярдаў ці 0.9% сродкаў наўрад ці моцна зьменіць сытуацыю. Зрэшты, ужо ў лістападзе дзяржава абяцала чарговы раз узьняць студэнцкія стыпэндыі, што можа запатрабаваць дадатковых сродкаў. Цяпер мінімальная стыпэндыя складае $22.06, максымальная (імянная) — 342.2 тыс. рублёў, ці $63.7 даляры.