Кіраўніца рады нацбясьпекі Ўкраіны выдала знакамітую прамову Джобса за сваю
Кіраўніцу рады нацыянальнай бясьпекі Ўкраіны Раісу Багатырову вінавацяць у плягіяце выступу заснавальніка кампаніі Apple Стыва Джобса, які той зрабіў у 2005 годзе перад амэрыканскімі студэнтамі.
Раіса Багатырова
Як піша «Украінская праўда», на цырымоніі ўручэньня дыплёмаў у адным з найбольш прэстыжных ўнівэрсытэтаў «Кіева-Магілянская акадэмія» 28 чэрвеня Багатырова выступіла з прамовай, якая цэлымі фрагмэнтамі нагадала знакаміты выступ заснавальніка кампаніі Apple Стыва Джобса перад студэнтамі Стэнфардзкага ўнівэрсытэту ў 2005 годзе.
У выступе Джобс распавёў тры гісторыі са свайго жыцьця. Тэкст знакамітага выступу Стыва вельмі хутка разышоўся па Сеціве і быў перакладзены на розныя мовы. Студэнты Кіева-Магілянскай акадэміі заўважылі, што прамова сакратаркі рады бясьпекі таксама ўтрымлівае тры парады. Прыгледзеўшыся да двух выступаў, журналісты знайшлі нямала «супадзеньняў».
Гэтак, Раіса Багатырову пачала сваё выступленьне наступнымі словамі: «Для мяне вялікі гонар быць сёньня тут з вамі, у дзень, калі выпускнікі атрымліваюць дыплёмы. У адной зь лепшых вышэйшых навучальных устаноў нашай краіны. Хачу падзяліцца сёньня з вамі высновамі са свайго ўласнай жыцьця і свайго ўласнага палітычнага досьведу. Толькі тры высновы. Нічога абсалютна грандыёзнага. Толькі тры высновы».
«Для мяне вялікі гонар быць з вамі сёньня на ўручэньні дыплёмаў аднаго з самых лепшых унівэрсытэтаў сьвету. Я не сканчаў інстытутаў. Сёньня я жадаю распавесьці вам тры гісторыі з майго жыцьця. І ўсё. Нічога грандыёзнага. Проста тры гісторыі», — сказаў у сваёй прамове Джобс.
Той самы выступ Стыва Джобса
Ёсьць і іншыя «супадзеньні»:
«Прабачце за драматызм, але гэта праўда. Час чалавека вельмі абмежаваны, — казала спадарыня Багатырова. — І таму выснову са свайго вопыту прапаную наступную: не жывіце чужым жыцьцём, не губляйце часу. Не трапляйцеся ў пастку догмы, якая раіць жыць чужымі думкамі. Не дазваляйце шуму чужых меркаваньняў перабіць ваш унутраны голас. Майце мужнасьць ісьці за сваім сэрцам і за сваёй інтуіцыяй. Яны нейкім цудам ведаюць, чаго вы хочаце ў жыцьці».
Стыў Джобс за 6 гадоў да гэтага казаў наступнае:
«Прабачыце за такі драматызм, але гэта праўда. Ваш час абмежаваны, таму не марнуйце яго на жыцьцё чужым жыцьцём. Не трапляйце ў пастку догмы, якая гаворыць жыць думкамі іншых людзей. Не дазваляйце шуму чужых меркаваньняў перабіць ваш унутраны голас. І найважнейшае, майце адвагу прытрымлівацца свайго сэрца і інтуіцыі. Яны нейкім дзіўным чынам ужо ведаюць тое, кім вы жадаеце стаць насамрэч».
У радзе бясьпекі Ўкраіны ня лічаць, што «запазычаньні» Багатыровай — плягіят. «Яна шмат чытае матэрыялаў, магчыма, гэта (прамова Джобса) і натхніла яе», — камэнтуюць справу ў прэс-службе рады бясьпекі.