У ЭГУ зьявіліся надзвычайныя грошы

Міжнародныя арганізацыі і ўрад Даніі вылучыў дадатковыя грошы для Эўрапейскага гуманітарнага ўнівэрсытэту. Сродкі пойдуць на навучаньне студэнтаў, адлічаных зь беларускіх ВНУ па палітычных прычынах.

У Эўрапейскім гуманітарным унівэрсытэце чакаюць дадатковых расходаў у сувязі з павелічэньнем колькасьці студэнтаў за кошт тых, хто быў адлічаны зь беларускіх ВНУ пасьля 19 сьнежня. Раней ЭГУ заяўляў пра тое, што гатовы ўзяць да сябе ўсіх, хто навучаўся ў Беларусі па блізкіх спэцыяльнасьцях.

Для мэтаў збору сродкаў на дапамогу такім студэнтам, у тым ліку на іх харчаваньне і жытло, быў створаны дадатковы Рэзэрвовы фонд. Першыя сродкі ў яго ўжо пералічыла Рада міністраў Паўночных краін, а таксама Данія (75 тысячаў эўра). Данія таксама дадала да іншага, Траставага фонду ЭГУ, яшчэ 300 тысячаў эўра. [адкуль грошы ў ЭГУ?]

Адлічаным студэнтам для таго, каб навучацца ў беларускім ўнівэрсытэце ў Вільні, патрэбныя толькі тры дакумэнты, у тым ліку «даведка пра арышт, зьняволеньне ці іншыя наяўныя дакумэнты, што сьведчаць пра рэпрэсіі».

Паводле дадзеных камітэту абароны рэпрэсаваных «Салідарнасьць», пакуль толькі тры студэнты былі адлічаныя зь беларускіх унівэрсытэтаў з-за палітыкі пасьля 19 сьнежня. Агулам мінімум 61 чалавеку ўжо пагражалі адлічэньнем ці звальненьнем у сувязі з пратэстамі.

Рахункі ЭГУ могуць значна папоўніцца ў бліжэйшы час дзякуючы канфэрэнцыі донараў, што пройдзе ў Варшаве 2 лютага. Намесьнік міністра замежных спраў Літвы ўжо заявіў, што ЭГУ варта падтрымаць матэрыяльна, бо ўнівэрсытэт «прышчэплівае павагу да культуры і мовы сваёй краіны».