Кітайскіх студэнтаў у Беларусі стане ў 3 разы болей?

Беларускі ўрад хоча навучаць ва ўнівэрсытэтах у 3.5 разы болей замежных студэнтаў, чым цяпер. Галоўная перавага беладукацыі, на думку чыноўнікаў, яе нізкі кошт. Ім у беларускія ВНУ зьбіраюцца зацягнуць ня толькі студэнтаў зь Кітаю і Віетнаму, але нават з Прыбалтыкі і Балканаў.

Як перадае БелТА, прэм’ер-міністар Міхаіл Мясніковіч зьбіраецца выправіць эканамічную сытуацыю ў тым ліку цераз павелічэньне колькасьці замежных студэнтаў у Беларусі. А пакуль болей за ўсё абурае яго невялікая колькасьць студэнтаў з Эўропы ў нашых унівэрсытэтах:

«Чаму мы арыентуемся на прыцягненьне на навучаньне ў нашых унівэрсытэтах толькі моладзі з краін Паўднёва-Ўсходняй Азіі? — турбуецца прэм’ер-міністар. — Чаму наша Міністэрства адукацыі, наш дыпкорпус не працуюць над тым, каб прыцягнуць моладзь з эўрапейскіх дзяржаў, у тым ліку краін Балтыі, Усходняй Эўропы?»

Прыцягваць замежных студэнтаў зьбіраюцца ў першую чаргу праз танную адукацыю. Прэм’ер-мінстар лічыць, што кошт адукацыі ў беларускіх ВНУ значна ніжэй, чым ва ўнівэрсытэтах Эўропы (глядзіце параўнаньне коштаў навучаньня ў іншых краінах і Беларусі).

Пры гэтым спадар Мясніковіч забыўся прыгадаць, што Беларусь засталася адзінай краінай кантынэнту, якая дагэтуль ня стала часткай Балоньскага працэсу. Сярод іншага сяброўства ў ім забясьпечвае прызнаньне дыплёмаў за мяжой. Таксама ў Беларусі амаль няма ангельскамоўных праграм бакаляўрыяту. Каб навучацца ў нашай краіне, замежніку папярэдне трэба вывучыць расейскую.

У 2009 годзе ў Беларусі навучаліся 9 тысячаў замежных студэнтаў. Большасьць зь іх — туркмэны. Мясьніковіч хоча давесьці колькасьць замежнікаў мінімум да 30 тысячаў.

Вырашаць жыльлёвую праблему ва ўмовах, калі ў некаторых ВНУ толькі кожны другі беларускі студэнт забясьпечаны інтэрнатам, прэм’ер-міністар прапануе цераз «малакватэрныя інтэрнаты».