Пакаленьне Y знайшло ў сацыяльных сетках самоту

Праблема адзіноты больш актуальная для моладзі, чым для людзей сталага ўзросту, сьцьвярджаюць навукоўцы. Па іх словах, 60% маладых брытанцаў часьцяком адчуваюць сябе самотнымі.

Паводле дасьледаваньня, праведзенага брытанскім дабрачынным фондам Mental Health Foundation, каля 60% апытаных брытанцаў ва ўзросьце ад 18 да 34 гадоў адчуваюць сябе самотнымі «часам» ці «часта». Аб гэтым піша BBC.

У той жа час у гэтым прызналіся толькі 35 адсоткаў рэспандэнтаў ва ўзросьце за 55. Зрэшты, розныя пакаленьні могуць па-рознаму інтэрпрэтаваць адзіноту, укладаючы ў гэта паняцьце выключна свой, суб’ектыўны сэнс.

Навукоўцы зьвязваюць падвышаны ўзровень адзіноты з распаўсюдам сучасных тэхналёгіяў і Сеціва, якія спарадзілі новыя спосабы зносінаў і скасавалі старыя, такія як традыцыйная пошта. Цяпер ня трэба пакідаць дом, каб паразмаўляць з суседам альбо знаёмым. Дастаткова проста зазірнуць у сацыяльную сетку, Facebook напрыклад.

Вось і атрымліваецца, што ў эпоху віртуальных кантактаў адзінокіх людзей становіцца ўсё болей: па дадзеных дасьледаваньня Mental Health Foundation, у пэрыяд з 1972 па 2008 год іх колькасьць падвоілася. Болей у гэтай статыстыцы стала перш за ўсё жанчын, чый псыхічны стан блізкі да дэпрэсіі.

Новыя тэхналёгіі, як і манэта: мае і той бок, і гэты — кажуць аўтары дасьледаваньня. З аднаго боку, яны спрашчаюць зносіны, зь іншага — заганяюць людзей у кампутарную прастору. Віртуальнае сяброўства падмяняе рэальнае, але гэта — сурагат. Каля траціны апытаных маладых брытанцаў заявілі, што яны лепей паразмаўляюць зь сябрам онлайн, чым пойдуць да яго ў госьці.

Між тым, як высьветлілі мэдыкі, падчас рэальных сустрэчаў у суразмоўцаў выпрацоўваецца гармон аксытацын, неабходны для нармальнай працы сэрца.

«Маладыя людзі, зь якімі мы працавалі, прызнаваліся, што тусоўкі ў сацыяльных сетках не замяняюць жывых зносінаў. І што яны адчуваюць пякучую адзіноту, — распавядае Сара Брэнан з дабрачыннай арганізацыі Yangminds. — Адзінота — велізарная праблема, якой мы павінны займацца. У апошнія гады наша грамадзтва пачало як бы распыляцца, распадацца на асобныя фрагмэнты».

Прырода сям’і перажывае зьмены. Шматдзетных, патрыярхальных сем’яў у Брытаніі сёньня ня так шмат, як раней.

Дзеці імкнуцца як мага раней пакінуць родны дом, жыць ад бацькоў на такой адлегласьці, якая не дазваляе надта часта наведваць іх.