Эўрапейская тэндэнцыя: беларускі выходзяць замуж усё пазьней

У Беларусі з кожным годам павялічваецца сярэдні ўзрост жанчыны пры ўступленьні ў шлюб, што ёсьць характэрнай зьявай для ўсёй Эўропы. За апошнія дзесяць гадоў беларускія нявесты «пастарэлі» ў сярэднім на 1.4 гады, хаця да заходнеэўрапеек, якія ідуць пад шлюб у 30, ім яшчэ далёка.

Сярэдні ўзрост уступленьня ў шлюб беларусак з 1995 па 2007 год. Дадзеныя United Nations Economic Commission for Europe

Як паведамляе БелТА, у 2009 годзе сярэдні ўзрост беларускіх нявест склаў 24.2 гады (у 2008 годзе — 23.9 года, у 2007 годзе — 23.8, а ў 2000 годзе — 22.8).

«Старэньне» шлюбу тлумачыцца тым, што значная частка і жанчын, і мужчын імкнуцца спачатку атрымаць адукацыю, часта сумяшчаючы яе з працоўнай дзейнасьцю, максымальна ўладкаваць будучае сямейнае жыцьцё.

Сярод эўрапейскіх краін пазьней за ўсіх ідуць замуж гішпанкі: сярэдні ўзрост першага ўступленьня ў шлюб сярод іх 32.9 гадоў. А самыя «раньнія» замужкі — малдаванкі, якія ідуць пад шлюб у сярэднім у 22.

Сярэдні ўзрост уступленьня ў шлюб грамадзянак розных краін Эўропы ў 2003 (чырвоны) і 2007 (сіні) годзе. Дадзеныя United Nations Economic Commission for Europe

Цікава, што чым далей на захад, тым старэйшымі выглядаюць маладыя. У Вялікабрытаніі сярэдняй нявесьце 28.5 гадоў, у Італіі — 29.8, а ў Францыі 29.7. І гэта не кажучы пра мужчын, якія ў гэтых краінах упершыню бяруцца шлюбам у 30.7, 32.6 і 31.9 гадоў адпаведна.

Адносна суседзяў, беларускія нявесты вылучаюцца ня моцна: літоўкі ўпершыню робяць гэта ў 25.5, латышкі ў 26.4, украінкі ў 24.1, а палячкі ў 25.1.

Адпаведна становяцца старэйшымі і маці першынцаў, прычым і ў гарадах, і ў вёсцы. Паводле статыстычных зьвестак, сярэдні ўзрост маці пры нараджэньні першага дзіцяці ў 2000 годзе ў Беларусі быў 23,3 года. А ў мінулым годзе жыхаркі Беларусі нараджалі першае дзіця ўжо ў сярэднім у 24,6 года.