The Toobes з новым кліпам у чаканьні альбому на лэйбле Tricky

Гэтая восень рызыкуе ўвайсьці ў аналы гурта The Toobes як найбольш прадуктыўная: перамовы з геніем трып-хопу Tricky, падаецца, скончаныя станоўча, канцэрт з Franz Ferdinand сыграны, а тут яшчэ новы кліп на песьню «Madonna» падкаціў.

Зрэжысаваны Мацеем Сабуравым, вядомым па працах для «Ляпіса Трубецкога», кліп на песьню «Madonna» зь першага і пакуль адзінага альбому «Hello» (2009) ужо «адпрэм’ерылі» ў галоўным логаве расейскіх альтэрнатыўшчыкаў — канале «A-One».

Як высьвятляецца, няпростыя здымкі «Madonna» маглі скончыцца лятальным канцом, але ўсё, дзякуй богу, абышлося:

«Я працаваў са шматлікімі групамі, але так гучна на барабанах на маёй памяці [як вакаліст і ўдарнік The Toobes Стас Ламакін] яшчэ ніхто ня стукаў, — прызнаецца кліпмэйкер Мацей Сабураў. — Каб мне не разарвала галаву, падчас дубляў я проста закрываў вушы рукамі».

The Toobes за два канцэрты скарылі Менск, цяпер на чарзе Піцер і Масква

Драйв вакаліста заўважыў ня толькі Мацей. Адзін з заснавальнікаў стылю трып-хоп, брытанскі музыкант Tricky плянуе выдаць дыску «цюбсаў» ў Эўропе ўвесну наступнага году на ўласным лэйбле Brownpunk.

У чаканьні запісу пад кіраўніцтвам Tricky музыкі зьбіраюцца даць пару канцэртаў у Маскве і Піцеры. Запрашэньні ў цэнтры расейскага музычнага жыцьця The Toobes зьвязваюць з пасьпяховым выступам на разагрэве ў ідалаў сярэдзіны 2000-ых Franz Ferdinand, які адбыўся два месяцы таму ў Піцеры.