Выбары он-лайн становяцца рэальнасьцю ў ЗША

На ўсходзе ЗША, у штаце Заходняя Вірджынія, прыняты закон, згодна зь якім усе грамадзяне штату, што знаходзяцца па-за межамі краіны, атрымаюць магчымасьць галасаваць он-лайн.

Новы закон аб інтэрнэт-галасаваньні называюць пілотным праектам, які накіраваны перш за ўсё на дапамогу вірджынскім салдатам, ня малая колькасьць якіх зараз служыць у розных частках сьвету. Цяпер яны, а таксама ўсе грамадзяне ЗША, пражываючыя ў Заходняй Вірджыніі, атрымаюць магчымасьць галасаваць на выбарах з дапамогай Сеціва і ўласнага кампутара.

Каб скарыстацца новым правілам, вірджынцу трэба знаходзіцца па-за межамі ЗША.

Для гэтага кожны выбаршчык атрымае сакрэтны код, які трэба будзе ўвесьці на адмысловым сайце. Пасьля інфармацыя аб выбары грамадзяніна будзе адасланая ў ЗША, дзе яе і апрацуюць.

Выбарчая сыстэма пакуль праходзіць стадыі тэставаньня. Экспэрты адзначаюць яе высокі кошт.

Каля 42 тысяч амэрыканцаў з правам голасу, якія пражываюць у Заходняй Вірджыніі, зараз знаходзяцца па-за межамі краіны. Зь іх толькі каля 10% галасавалі на апошніх прэзыдэнцкіх выбарах, паведамляе WHCV.com.