Кітайскія інтэрнэт-карыстальнікі дэманструюць сваю сілу

Кітайскія інтэрнэт-карыстальнікі сьвяткуюць маленькую перамогу над цэнзурай, дапамогшы абараніць дзяўчыну, якую абвінавачвалі ў забойстве чыноўніка, які спрабаваў згвалтаваць яе. 22-гадовая Дэн Юйцяо стала сапраўдным сымбалем барацьбы з карумпаваным апаратам КНР.

Як паведамляе France Press, тры тыдні таму Дэн Юйцяо (Deng Yuqiao), лазеншчыца гасьцініцы ў цэнтральнай правінцыі Хубэй, зарэзала мясцовага чыноўніка кухонным нажом. Яна сама паведаміла пра гэта паліцыі і патлумачыла, што здарэньне адбылося выпадкова ў час барацьбы з гвалтаўніком.

Але дзяўчыну адразу ж абвінавацілі ў забойстве. А ў Кітаі за такое злачынства часьцей за ўсё прысуджаюць сьмяротнае пакараньне.

Гісторыя трапіла ў Сеціва і ўскалыхнула кітайскіх інтэрнэт-карыстальнікаў. У прыватнасьці, пра сытуацыю з Дэн Юйцяо напісаў адзін з самых вядомых кітайскіх блогераў Tu Fu, які вядомы як «Разбойнік, які бяжыць за ветрам». Ён наведаў шпіталь, дзе лекавалася ад атрыманых ад сваёй «ахвяры» траўмаў Дэн. У хуткім часе зьявіліся групы падтрымкі, былі змабілізаваныя адвакаты.

Справа стала сымбалем несправядлівасьці ў грамадзтве, жорстка кантралюемым камуністычнай партыяй.

«Гэта адлюстраваньне канфлікту, які ўжо даўно існуе паміж народам і дзяржслужачымі. Улада хавае факты, каб абараніць свае ўласныя інтарэсы. Зараз людзі бачаць, што паліцыя і мясцовыя ўлады заадно. І людзі разумеюць, што з кожным можа такое здарыцца», — тлумачыць настроі вакол выпадку зь дзяўчынаю Ba Zhongwei, адзін зь лідэраў групы падтрымкі Дэн Юйцяо.

Пэкінскія студэнты зладзілі пэрфоманс пад назовам «Мы ўсе — Дэн Юйцяо».

На здымку - акцыя ў падтрымку дзяўчыны, якая забіла дзяржчыноўніка ў мэтах самаабароны ад гвалту. Сьлёганы на плякатах: «Паліцыя Бадангу: пазор і катастрофа для ўсёй паліцыі», «Жорстка пакараць гвалтаўнікоў, вызваліць Дэн Юйцяо».  

Паліцыя ў адказ заявіла, што дзяўчына перавысіла межы дапушчальнай самаабароны, але ў выніку розгаласу ўсё ж выпусьціла падсьледную з турмы пад хатні арышт. Таксама два чыноўнікі, якія фігуравалі ў справе як саўдзельнікі спробы згвалтаваньня, зьнятыя са сваіх пасадаў.

З аднаго боку, гэты выпадак падкрэсьлівае нарастаючую моц Інтэрнэту ў краіне, дзе традыцыйныя СМІ жорстка кантралююцца, а судовая сыстэма залежыць ад улады. Зь іншага боку, кітайскія ўлады таксама гэта разумеюць. Зараз у Кітаі напярэдадні 20-х угодак трагічных падзеяў 4 чэрвеня 1989 году па плошчы Цяньаньмэнь, у выніку якіх загінулі сотні і, магчыма, тысячы людзей, зачынены блог «Разбойніка, які бяжыць за ветрам». Таксама зычыненыя папулярныя чаты й форумы, заблякаваны доступ да Twitter, YouTube, Bing, Flickr, Opera, Live, Wordpress і Blogger. Звычайныя СМІ атрымалі ўказаньне падыходзіць да падрыхтоўкі матэрыялаў «з асьцярожнасьцю».