Лідэр «Безь Білета» выдае свой інструмэнтальны дыск, а гурт рыхтуецца да Дня Безьбілетніка

Адразу два новых дыскі, што маюць непасрэднае дачыненьне да гурта «Безь Білета», пабачаць сьвет бліжэйшым часам. 7 лістапада адбудзецца рэліз альбома Віталя Артыста «Не безь білета», улучыўшага ў сябе 23 інструмэнтальныя творы для разнастайных саўндтрэкаў. Выхад дыску прымеркаваны да Дня безьбілетніка 2008, які гурт адсьвяткуе ў менскім «Рэактары».

Гурт «Безь Білета». Фота Тані Кушнэр.

Віталь Артыст ўжо даўна вядомы як пасьпяховы кампазытар, які працуе ў самых разнастайных жанрах: ад фольку да трып-хопу. Сярод ягоных працаў музычныя творы для кінафільмаў, тэлесэрыялаў, тэатральных пастановак, тэлепраектаў, мультфільмаў і рэклямы.

У альбом «Не безь білета», які выходзіць на лэйбле West Records, увойдуць найбольш яркія з створаных лідэрам «Безь Білета» інструмэнтальныя творы, прычым, большасьць трэкаў выдаюцца ўпершыню.

А у Расеі 28 кастрычніка выходзіць зборнік «Уроки русского. Том первый», у які ўвайшла песня «Безь Білета» «Летуценьнікі», якая ўжо дванаццаты тыдзень трымае пазыцыі на верхніх радках расейскага «Хит-парада двух столиц». Гэта кампіляцыя лепшых рускамоўных трэкаў 2008 года па вэрсіі аўтарскай перадачы вядомага журналіста Андрэя Бухарына. Праграма штотыдзень выходзіць у эфіры «Радыё Максымум». Трэк-ліст уключае кампазыцыі як расейскіх выканаўцаў (Яўген Грышкавец, «Tequilajazzz», «Слот», «Сегодня ночью»), так і артыстаў з ЗША («Brazzaville»), Беларусі («Безь Білета»), Літвы (Аліна Арлова).

Да сьвяткаваньня Дня безьбілетніка 2008 можна далучыцца зь любой кропкі сьвету, дзякуючы інтэрнэт-трансьляцыі беларускага NETradio. 7 лістапада ўсе наведвальнікі менскага канцэрту «Безь Білета» змогуць стаць яшчэ і стваральнікамі канцэртнага відэа на песню «Дзьве лодкі». Для гэтага дастаткова зьняць на свой мабільны тэлефон або камеру, як гурт выконвае гэты гіт (незвычайныя ракурсы вітаюцца!). Атрыманы файл застанецца толькі «заліць» на сайт netradio.by. Затым сіламі адмыслоўцаў NETradio будзе зроблены мантаж, і адбудзецца інтэрнэт-прэзэнтацыя відэа.