У новым кліпе «Ляпісаў» зьнялося 300 кароваў
Здымкі кліпа «Маніфэст», якія адбыліся ў жніўні пад Менскам, сталі самымі маштабнымі за ўсю гісторыю гурта «Ляпіс Трубяцкой». Для адной з сцэн у калгасе быў арэндаваны цэлы статак кароваў з двума пастухамі і двума сабакамі.
У іншым эпізодзе зьнялося роўна 50 сьвіньняў, таксама ў здымачным працэсе былі задзейнічаныя сапраўдныя алені, зайцы, бабры і яноты. Усе гэтыя жывёлы гралі ролю электарата, перад якім выступаў зь перадвыбарнымі прамовамі «палітык» Сяргей Міхалок — гэта тое нямногае, што зараз вядома аб сюжэце кліпа.
Іншыя падрабязнасьці сцэнару трымаюцца ў строгім сакрэце, паколькі, па словах рэжысёра роліка Мацьвея Сабурава, «галоўным у гэтым кліпе будзе эфэкт нечаканасьці».
«Я думаю, што фінал відэа не прадбачыць ніхто. Асабліва – паглядзеўшы яго пачатак», – лічыць Сабураў.
Кліп «Маніфэст» павінен зьявіцца на экранах ужо праз 10 дзён – да сусьветнай прэм'еры аднайменнай канцэртнай праграмы «Ляпісаў», якая адбудзецца 14 верасьня ў Віцебску. Сам альбом выйдзе ў кастрычніку. Студыйную вэрсію песьні «Маніфест» ужо можна пачуць на афіцыйным MySpace «Ляпісаў».
- Пачатак у 18.00
- Квіткі ад 20 да 50 тысяч у продажы ў Менску і Віцебску.
- Даведка і замова па тэл.: (17) 285 71 00, (29) 655 55 96, (33) 655 55 96.
- Расклад цягнікоў да Віцебску зь Менску адмыслова зьмешчаны на сайце www.lyapis.com
- Аўтобусны тур на канцэрт зь Менску — linijazvuka.livejournal.com/3754.html
паводле прэс-рэлізу