Кітайцы будуць вучыцца ў беларускіх ВНУ на кітайскай мове?

Беларускія парлямэнтарыі рыхтуюць да сэсіі папраўкі ў некаторыя законы, датычныя вышэйшай адукацыі, у прыватнасьці плянуецца, што замежныя студэнты змогуць навучацца ня толькі на беларускай і расейскай мовах.

Як паведамляе СТВ, сёньня на паседжаньні парлямэнту быў абмеркаваны законапраект, паводле якога замежныя студэнты змогуць ажыцьцяўляць навучаньне ў беларускіх ВНУ ня толькі на дзяржаўных мовах.

У мінулым годзе ў Беларусі навучаліся 6 741 замежных студэнтаў. Сярод іх, калі не ўлічваць краіны СНД,  – большасьць кітайцы (звыш тысячы зараз і будзе яшчэ болей), а яшчэ індыйцы, сірыйцы, ліванцы, іранцы ды інш.

Таксама дэпутатамі абмяркоўвалася папраўка ў закон «Аб адукацыі», якая вызваліць тых, хто не адпрацаваў па разьмеркаваньні, ад пакрыцьця выдаткаваных на навучаньне бюджэтных сродкаў, калі яны адразу па заканчэньні ВНУ паступілі ў магістратуру або асьпірантуру на дзённае аддзяленьне.