Кітайскіх студэнтаў на Беларусі будзе болей

Кітай будзе павялічваць колькасьць студэнтаў, якія атрымоўваюць адукацыю ў беларускіх ВНУ. На сёньняшні дзень на Беларусі вучыцца звыш тысячы кітайцаў.

Аб гэтым паведаміў сёньня Надзвычайны і Паўнамоцны Амбасадар Кітая на Беларусі У Хунбінь на адкрыцьці выставы «Адукацыя ў Кітаі», якая праходзіць у ліцэі БДУ да 13 лістапада.

На сёньняшні дзень у беларускіх ВНУ вучыцца звыш тысячы кітайскіх студэнтаў. Яны атрымоўваюць адукацыю ў галіне мэдыцыны, тэхнічных навук, матэматыкі, журналістыкі.

Глава кітайскай дыпляматычнай місіі падкрэсьліў:

«У сувязі зь імклівым ростам кітайскай эканомікі патрэба ў добрых адмыслоўцах у КНР узрастае, таму, улічваючы высокую якасьць беларускай адукацыі, мы будзем паступова павялічваць колькасьць студэнтаў, якія будуць навучацца на Беларусі.»

У Хунбінь нагадаў, што за савецкім часам на Беларусі вучыліся дзесяткі тысяч кітайскіх студэнтаў.

Паводле БЕЛТА­ ­