Neuro Dubel запрашае на вялікі сольны канцэрт

23 красавіка гурт Neuro Dubel адыграе вялікі сольны канцэрт у сталічным клюбе «Рэактар». Выступ рок-каралёў стане своеасаблівым працягам прэзэнтацыі новага дыска Stasi, прызнанага на сёлетняй Рок-Каранацыі «Альбомам Году».

Neuro Dubel прэзэнтуе Stasi 17 лютага ў «Гудвіне». Фота Волі Кузьміч.

Канцэрт стане знакавым і для аматараў раньняга Neuro Dubel — у другім аддзяленьні музыкі выканаюць свае старыя гіты, у тым ліку і непатапляльнага «Гагарына».

«Мы паспрабуем зрабіць выступ пад кодавым назовам «Па хвалях нашай памяці», — адзначыў лідэр гурта Аляксандр Кульлінковіч.

Канцэрт пройдзе ў менскім «Рэактары» — клюбе, дзе чатыры гады таму Neuro Dubel трыюмфальна прэзэнтаваў свае «Танкі»:

«Само па сабе месца правядзеньня канцэрта для нас вельмі сымбалічнае — мы вярнуліся ў стары добры „Рэактар“. Утульней, чым тут, я сябе нідзе не адчуваў».

Вярнуліся музыкі і да свайго поўнага складу — пасьля доўгага перапынку на сцэне зьявіцца нязьменны бэк-вакаліст Юра Навумаў. Легендарная «Переехало комбайном», што шмат страціла без падпеўкі Юрася, ізноў загучыць у сваім арыгінальным выкананьні.

«Гэта будзе вялікі і знакавы канцэрт, — абяцае Аляксандр Кульлінковіч, — якасны гук і выдатны настрой мы вам абяцаем».