Адвакаты Цярэнцьева распрацавалі лінію абароны

Суд па справе Савы Цярэнцьева — расейскага блогера, якому паграджае да двух год зьняволеньня за камэнтар у жж — адбудзецца 31 сакавіка. Адвакаты і праваабаронцы прыводзяць доказы незаконнасьці абвінавачваньня і будуць патрабаваць вяртаньня справы ў следчыя органы. Напрыклад, Уладзімір Пуцін прапаноўваў адсякаць варам рукі, але ніхто да суду яго не прыцягваў.

Учора стала вядомым, што першае судовае паседжаньне па справе Савы Цярэнцьева адбудзецца 31 сакавіка. Гэта першы ў Расеі суд над блогерам за камэнтар у жж. За справай сочаць ня толькі карыстальнікі Сеціва, але і юрысты.

Адвакаты лічаць, што абвінавачваньне блогера ў «распальваньні варожасьці» да сацыяльнай групы — міліцыянтаў, грунтуецца на доказе, атрыманым з грубымі парушэньнямі Крымінальна-працэсуальнага кодэксу РФ. З тае нагоды на першым жа паседжаньні адвакаты будуць выступаць за вяртаньне справы ў сьледчыя органы.

Першае парушэньне: выснова, што Сава распальваў «сацыяльную варожасьць», была зробленая на падставе сацыягуманітарнай экспэртызы, якая была праведзеная за тыдзень да атрыманьня загаду на яе правядзеньне. Экспэртыза праводзілася філёзафам, філёлягам і гісторыкамі. 

Другое парушэньне: сьледчы Сяргей Рамановіч, што распачаў незаконную экспэртызу з парушэньнямі — сын былога міністра ўнутраных спраў Рэспублікі Комі. Па лёгіцы, ягоны бацька таксама належыць да абражанай сацыяльнай групы, а значыцца Сяргей Рамановіч мае ўскосную зацікаўленасьць у абвінавачваньні Цярэнцьева.

Таксама адвакаты нагадваюць пра правы чалавека, у прыватнасьці, пра Артыкул 10 Эўрапейскай канвэнцыі аб абароне правоў чалавека і асноўных свабодаў, што гарантуе права свабодна выражаць сваё меркаваньне.

Праваабаронца Эрнэст Мязак прывёў у прыклад справу «Таргерсан супраць Ісьляндыі», разгледжаную Эўрапейскім судом.

Ісьляндзкі журналіст у двух артыкулах ужыў адносна паліцэйскіх жорсткія выказваньні, кшталту: «дзікія жывёлы ва ўніформе», «ахвяры паліцэйскага сьвінства», «дазваляючы сьвіньням і садыстам даваць волю сваім вычварэнствам» ды іншыя. 

Нацыянальны суд прысудзіў журналісту штраф за абразу паліцэйскіх Рэйк'явіку, але з гэтым не пагадзіўся Эўрапейскі суд па правох чалавека:

«Гэта праўда, што абодва артыкулы напісаныя ў вельмі моцных выразах. Аднак, зважаючы на іх мэты і ўзьдзеяньне, дзеля якога яны пісаліся, Суд прытрымліваецца меркаваньня, што выкарыстаная ў артыкулах мова ня можа расцэньвацца як празьмерная».

Таксама праваабаронца Эрнэст Мязак сьцьвярджае, што выкарыстаная Савай прапанова «сжигать неверных милиционеров» — гіпэрбала, і нагадвае, што папярэдні прэзыдэнт Расеі Ўладзімір Пуцін прапаноўваў адсякаць рукі варам.

ЖЖ-карыстальнік _sergey задаецца пытаньнем: Сава рабіў прапановы толькі ў дачыненьні «неверных» міліцыянтаў — калі міліцыянты абразіліся як сацыяльная група, атрымоўваецца, што яны ўсе прызналі сябе «неверными»?

Фота Securitylab.ru