Сёньня Дзень свабоды слова ў Інтэрнэце

Арганізацыя «Рэпарцёры бязь межаў», пры падтрымцы ЮНЭСКА, аб’яўляе першы Дзень свабоды слова ў Інтэрнэце — 12 сакавіка. З тае нагоды арганізацыя зноў запусьціць свой праект «24 гадзіны супраць цэнзуры» і запрашае ўсіх карыстальнікаў сабрацца на сайце www.rsf.org на кібэрдэманстрацыі ў дзевяці краінах — «чорных дзірках Сеціва».­

Нас сёньняшні дзень за кратамі па ўсім сьвеце знаходзяцца каля 62 Інтэрнэт-дысыдэнта — толькі за тое, што яны карысталіся сваім правам на свабоду слова і самавыражэньня ў Сеціве. Кітай застаецца самай вялікай турмой для Інтэрнэт-журналістаў і блогераў.

Каб спыніць урадавую цэнзуру і запатрабаваць больш свабоды онлайн, «Рэпарцёры бязь межаў» заклікаюць да ўдзелу ў акцыі. Яна пройдзе ў дзевяці краінах, якія ўяўляюць найбольшую небясьпеку для Сеціва. Цягам 24 гадзін, ад 11.00 12 сакавіка да 11.00 13 сакавіка (час парыскі), карыстальнікі змогуць ствараць аватары, абіраць паведамленьні для банэраў і прыняць удзел у адной з кібэрдэманстрацыяў, што закрануць Мьянму, Кітай, Паўночную Карэю, Кубу, Егіпет, Эрытрэю, Туніс, Туркмэністан і Віетнам.

«Рэпарцёры бязь межаў» таксама апублікуюць новы сьпіс «ворагаў Інтэрнэту» і абноўлены варыянт «Гіда Інтэрнэт-дысыдэнта».

Падчас правядзеньня леташняй акцыі «24 гадзіны супраць цэнзуры» каля 40 тысяч Інтэрнэт-карыстальнікаў аб’ядналіся дзеля таго, каб з мапы сьвету зьніклі «чорныя дзіркі Інтэрнэту». Сёньня ў кожнага ёсьць магчымасьць яшчэ раз націснуць на ўлады, якія перашкаджаюць вольнаму функцыянаваньню той прасторы, якая створаная быць свабоднай.

Паводле Reporters without borders