Цікавіць навучаньне ў Інданэзіі?

Прапануюцца стыпэндыі на навучаньне ад 6 да 12 месяцаў у інданэзійскай ВНУ ці каледжы. Стыпэндыя разьлічана на студэнтаў, якім цікава інданэзійская мова, мастацтва і музыка.

У большасьці беларускіх ВНУ складана знайсьці інфармацыю хоць пра якія-небудзь стыпэндыі на нашым кантынэнце, затое іх можна знайсьці ў Інтэрнэце. А тут атрымалася адваротнае. У некалькіх менскіх ВНУ на ўнівэрсытэцкай дошцы аб’яваў зьявілася абвестка пра магчымасьць навучаньне беларускіх студэнтаў у Інданэзіі. 

Паводле афіцыйнага сайту Амбасады Рэспублікі Інданэзія ў Польшчы да ўдзелу ў конкурсе запрашаюцца студэнты і студэнткі, якім было б цікава вывучаць інданэзійскую мову, мастацтва і музыку.

Праграма накіравана таксама на паляпшэньне культурных сувязей паміж краінамі. На 2008–2009 гады прапануюцца навучальныя праграмы на 6 месяцаў ці на 1 год. 

У зьмест заяўкі ўваходзіць таксама дэклярацыя, зь якой прэтэндэнт (-ка) на стыпэндыю мусяць быць згодныя і падпісаць. Так, студэнтам і студэнткам, трэба выконваць правілы ўнівэрсытэта ці каледжа, устрымацца ад палітычнай актыўнасьці і ўдзелу ў бізнэсе, не зацяжарыць і не ўвязвацца ў гандаль наркотыкамі.

Форму заявак, а таксама падрабязную інфармацыю пра ўмовы, памер стыпэндыі шукайце на афіцыйным сайце Амбасады Рэспублікі Інданэзія ў Варшаве.