Сёньня Франака Вячорку адлічылі з унівэрсытэту

Падстава — «акадэмічная непасьпяховасьць». Падчас апошніх двух іспытаў Франак знаходзіўся на Акрэсьціна. Пераздаваць яму прызначылі экзамэнацыйным камісіям, якія, нагледзячы на падрыхтаванасьць студэнта, падпісалі пратаколы зь незадавальняючымі адзнакамі. Зараз Франак заклікае да актыўнай супольнай кампаніі салідарнасьці і зьбіраецца падаць скаргу ў суд.

Сёньня, 15 лютага, а 10 раніцы дэкан факультэту журналістыкі БДУ Сяргей Дубовік паведаміў Франаку Вячорку, што загадам рэктара за подпісам прарэктара ён адлічаны за «акадэмічную непасьпяховасьць».

Франак на момант адлічэньня вучыўся на трэцім курсе, меў сярэдні бал 8,7, дзесяткі па курсавых, павышаную стыпэндыю, прэміі і дыплёмы.

16 студзеня Вячорка быў затрыманы і асуджаны на 15 сутак за лаянку. Зараз ён працягвае абскарджваць вырак у розных судовых інстанцыях.

За час адбываньня пакараньня Франак прапусьціў два іспыты. Папярэднія тры былі здадзеныя без праблем. Знаходжаньне на Акрэсьціна не было прызнаным паважлівай прычынай для няяўкі на іспыты. Таму Франаку прызначылі экзамэнацыйныя камісіі па абодвух іспытах: расейскай літаратуры і стылістыцы. Па першым прадмеце Вячорку паставілі «тры», а па другім — «два».

У сваіх ведах па дадзеных прадметах Франак быў упэўнены. Гутарка са студэнтам доўжылася некалькі гадзін, пытаньні, якія яму задавалі, часам нават ня тычыліся прадмета.

У Вячоркі ёсьць аўдыёзапіс у пацьверджаньне перадузятасьці экзамэнатараў. Зараз Франак зьбіраецца абскардзіць сваё адлічэньне ў судзе. Таксама ён заклікае да актыўнай кампаніі падтрымкі, якая складаецца з шасьці пунктаў:

1. Збор подпісаў на журфаку ды БДУ на імя Дубовіка і Стражава з патрабаваньнем узнавіць на вучобе;
2. Улёткава-налепкавыя кампаніі;
3. Нагадваць выкладчыкам, якія ўскосна бралі ўдзел у адлічэньні, пра тое, якой цаной яны баранілі свае інтарэсы;
4. ЖЖ-кампанія па інфармаваньні;
5. Міжнародная кампанія, прыпыненьне ўсіх міжнародных сувязяў БДУ;
6. Судовыя разьбіральніцтвы.