Фільм «Жыве Беларусь» з’явіцца ў Сеціве ўжо ўлетку. Рэпартаж з прэм’еры

Generation.by схадзіў на варшаўскую прэм’еру галоўнага беларускага блакбасцера сезону «Жыве Беларусь» і пабачыў на ёй усё тыя ж твары. Рэпартаж з прэм’еры Аляксея Нарко.

Сёмая вечара. Еду ў цэнтр Варшавы на прэм’еру, мабыць, першага ў сваім родзе фільму пра рэаліі краіны, якую на Захадзе ўжо звыкла называюць апошняй дыктатурай Еўропы. Завецца стужка «Жыве Беларусь». Ад сёння яе пачнуць паказваць па ўсёй Польшчы, але ў «Варшаве галоўная» прэм'ера з удзелам некаторых значных асобаў фільму. Прыязджаю на 15 хвілін раней. На ўваходзе ўжо стаіць натоўп людзей. На маё здзіўленне, тут не шмат і беларусаў: галоўным чынам прыйшлі маладыя палякі, ёсць людзі і сталага ўзросту.

Год таму «Жыве Беларусь», на здымкі якога сышло 6 млн. злотых (амаль $2 млн.), стаў першым беларускамоўным фільмам, які быў прэзентаваны ў Канах. Фільм быў зняты ў Польшчы польскім кінарэжысёрам Кшыштафам Лукашевічам. Музыку да яго напісаў Лявон Вольскі, а большасць галоўных роляў сыгралі беларускія акторы.

Прэзентацыя фільму пачынаецца з пытанняў і адказаў да Зміцера «Вінсэнта» Папко, які сыграў галоўную ролю прызыўніка Мірона, і да аднаго з сцэнарыстаў Франака Вячоркі. Рэжысёра фільму Кшыштофа Лукашевіча, на жаль, у залі няма, але запрошаныя грамадская актывістка і жонка Зміцера Дашкевіча Наста, Натальля Пінчук (жонка Алеся Бяляцкага) і Марына Адамовіч (жонка Міколы Статкевіча), а таксама кандыдат у прэзідэнты на выбарах 2010 году Алесь Міхалевіч.

На пачатку Вінсэнт і Франак прэзентуюць фільм. Сцэнар фільму збольшага грунтуецца на гісторыі Франака Вячоркі — часе, калі ён служыў у войску. Ролю галоўнага героя з яшчэ адным «характэрным» для беларускай рэчаіснасці імем «Мірон» якраз і выконвае Вінсэнт. Але закранае стужка і гісторыі іншых беларусаў з няпростым лёсам: вязняў сумлення, некаторых палітычных і беларускамоўных актывістаў.

Паказаць «праўду, якую нават беларусы не заўважаюць»

Стужка пачынаецца з знаёмай для многіх беларусаў гісторыі: хлопчыка Мірона, нягледзячы на кепскае здароўе, адпраўляюць у вёску недалёка мяжы Беларусі і Украіны, у зону Чарнобыльскага адчужэння. Там ён вядзе дзённік, дзе апісвае рэаліі воінскага жыцця. Недзе знаходзіць мабільны тэлефон і пачынае перапісвацца са сваёй дзяўчынай Верай (польскай актрысай Каралінай Грушкай). Апошняе ператварае паведамленні Мірона ў воінскі блог, які становіцца даволі папулярным, асабліва сярод беларускай моладзі (дарэчы, у кадрах з блогам некаторыя пазнаюць старую версію Generation.by).

Спецслужбы хутка даведваюцца пра гэта і імкнуцца знайсці крыніцу «небяспекі». Вядома, у іх тое хутка атрымліваецца. У Веры канфіскуюць дыск з кампутара, а на БТ выходзіць класічны сюжэт пра наркапрытон Мірона і Веры.

Як заўважае ў час прэм’еры Франак, ягоная асабістая сітуацыя ў войску была цяжэйшай за тое, што можа пабачыць на экране.

«Былі нават моманты, калі дзяды абсцыкалі навабранцаў, але гэта мы ўжо не маглі паказаць у кінастужцы, — кажа Франак Вячорка. — Мы хацелі паказаць войска як мікра-мадэль Лукашэнкаўскай краіны».

«Фільм для прыгожых жанчын — жонак палітвязняў, і для ўсіх тых, хто пазбаўлены волі ў Беларусі. Фільм у вялікай ступені мастацкі са сваёй метафарай, але яна існуе адмыслова, каб паказаць праўду, якую нават простыя беларусы не заўважаюць», — кажа адзін з натхняльнікаў стужкі.

Фінал фільму, які прыпадае на час Плошчы 2010 году, апраўдвае сваю характарыстыку «драмы», а таксама лішні раз нагадвае, пра якую краіну ён быў зняты. Наста Палажанка скажа пасля прагляду, што «ў дзень, які прыпадае на канец фільму, для нас шмат што пачалося, і я ўпэўнена, што кропку паставім мы». Цікава, якім знакам прыпынку стане «Жыве Беларусь» у спісе стужак гэткага стылю ў Беларусі?

Вытворцы фільму абяцаюць, што «Жыве Беларусь» з’явіцца ў Сеціве ўжо летам.

• «1984» на мінскіх вуліцах: гран-пры фестываля Smartfilm атрымаў буктрэйлер на раман Джорджа Оруэла

  Пяты фестываль мабільнага кіно velcom Smartfil падвёў вынікі і ўзнагародзіў пераможцаў. Фестываль доўжыўся тры месяцы, яго ўдзельнікі здымалі буктрэйлеры – відэаролікі да кніг

• Velcom прапануе атрымаць 30 млн. руб. за лепшы прома-ролік беларускай літаратуры, зняты на смартфон

  У Беларусі адкрыўся пяты юбілейны фестываль мабільнага кіно velcom Smartfilm. Сёлета тэма фестывалю – буктрэйлеры.