Сёньня «Палац» выступіць ў фінале «Эўрафэсту» на Першым канале

А пераможца «Эўрафэсту» паедзе прадстаўляць Беларусь на Эўрабачаньне. Лідэр «Палацу» Алег Хаменка на лёсаваньні 15 ўдзельнікаў выцягнуў лічбу 12, таму выступ гурта будзе напрыканцы канцэрту. Тэлетрансьляцыя пачынаецца сёньня ў 21:45. Да здымак засталося паўдні. Зь якім настроем рыхтуецца «Палац»?

З Generation.by дзеліцца Алег Хаменка:

«Чакаем, што выступ усё ж такі адбудзецца, таму што ўжо столькі разоў абламываліся перад усялякімі дзяржаўнымі мерапрыемствамі. Спадзяемся, што ўсё будзе добра. Прасьпяваем чысьценька:)»

Шанцы на перамогу «Палацу» Алег ацэньвае як «сьціплыя». «Але яны ёсьць», — удакладняе музыка.

Апошні раз «Палац» зьяўляўся ў эфіры беларускіх дзяржаўных каналаў амаль тры гады таму.У 2004-м гурт разам з многімі іншымі патрапіў у так званы «сьпіс забароненых». Але пасьля нядаўняй сустрэчы музыкаў з ідэолягам адміністрацыі прэзыдэнта ўсе ў чаканьні, ці «размарозяць» гурты і дазволяць бесперашкодна ладзіць канцэрты. Сёньня й пабачым. ­