«Дзяўчына мары» згубілася ў мэтро і знайшлася праз Інтэрнэт

У васьмімільённым Нью-Ёрку з дапамогаю інтэрнэту хлопец адшукаў дзяўчыну сваёй мары, у якую закахаўся зь першага позірку, убачыўшы ў вагоне мэтро. І хаця Каляды яшчэ ня хутка, цуды ў мэгаполісе ўжо пачаліся.

Вось і гатовы сцэнар для чарговага галівудзкага хэпі-энду. З той толькі розьніцай, што гэтая казка — сапраўдная гісторыя аднаго каханьня.

21-гадовы вэб-дызайнэр Патрык Мобэрг з Брукліну закахаўся зь першага погляду ў незнаёмку, пабачыўшы яе ў вагоне мэтро. Але неўзабаве згубіў яе ў натоўпе.

Аднак адступаць Патрык не хацеў. Вярнуўшыся дахаты, ён хуценька стварыў сайт www.nygirlofmydreams.com, з дапамогаю якога і спадзяваўся знайсьці «дзяўчыну сваёй мары».

Патрык намаляваў сябе і яе, з падрабязным апісаньнем. «Дзяўчына мары» была апранутая ў блакітныя шорты і таго ж колеру панчохі, цёмныя валасы ўпрыгожвала чырвоная кветачка, а шчокі — ружовы румянец. Дзяўчына рабіла нейкія нататкі.

На пазначаны нумар адразу пачаліся званкі. Кранутыя такім рамантычным учынкам, дзяўчаты прапанавалі пазнаёміцца: «Я — не яна, але ты такі мілы, давай сустрэнемся». За некалькі гадзінаў мэйл-бокс запоўніўся лістамі.

І спрацавала!

Дзеўчыну Патрык запрыкмеціў у нядзелю, а знайшоў у васьмільённым горадзе ўжо ў аўторак! Ейны сябар скантактаваўся зь ім і даслаў фотку. І дзеўчына аказалася той самаю. 

22-гадовая Каміла Хэйтан з Аўстраліі, як сталася, таксама жыве ў Брукліне. Яна праходзіць практыку ў адным з часопісаў. 

«Неверагодна! Я не магу паверыць, што гэта здарылася!» — толькі і вымавіла Каміла ў інтэрвію.

Але пасьля гэтага на прыватнае жыцьцё пары апусьціліся фіранкі: на сайце зьвілася паведамленьне «Знайшоў! Сур’ёзна.», і дзеля інтарэсаў Патрыка і Камілы, сайт аднаўляцца ня будзе.

Хаця, хто ведае? Амэрыканцы любяць казкі. Верагодна, калі-небудзь мы ўбачым гэтую гісторыю ў кінатэатрах.

Малюнкі з NYGirlOfMyDream­ ­