Лёндан зацаніў «Капітал» Ляпісаў

«Ляпіс Трубяцкой» скарыў горад «туманаў і мусульманаў» - Лёндан, але на гэтым не супакоіўся - ўсе шляхі прывялі такі ў Рым. Неверагодны посьпех «Капіталу» і саўндтрэка, напісанага Міхалком - у самых прасунутых сталіцах Эўропы.

Дзякуючы Сеціву кліп гурта «Ляпіс Трубяцкой» «Капітал» нашумеў ня толькі на постсавецкай прасторы. Канцэптуальны ролік, рэжысэрам якога выступіў Аляксей Церахаў, апынуўся ў цэнтры гарачых дыскусіяў на відэасайтах далёкага «замежжа» - ад Партугаліі да Японіі. А днямі «Капітал» выцягнулі зь Сеціва ў Брытаніі.

Кліп убачылі арганізатары Bug Show – прэстыжнага паказу відэакліпаў, які ладзіцца кожныя тры месяцы ў Лёндане. «Капітал» патрапіў у адзін шэраг з самымі арыгінальнымі відэа сьвету і днямі быў прадэманстраваны на чарговым Bug Show.

«Вялікі экран даў магчымасьць разглядзець усе шматлікія дэталі, - адзначыў Адам Бакстан, папулярны брытанскі актор і радыё-дыджэй. - Я ўражаны тым, як адзін чалавек здолеў усё гэта прыдумаць і намаляваць»

З Бакстанам цалкам згодная і Кэці Сэмвэл, каардынатарка паказу:

«Кліп вулучаецца неверагоднай дэталізацыяй і ашаламляльнай арыгінальнасьцю. Таксама нам да спадобы песьня, на якую ён зьняты!»

Але выбітныя дасягненьні Ляпісаў у туманным альбіёне – не адзіная добрая навіна ад гурта. Прыемныя весткі прыйшлі і з Рыму: на кінафэстывалі RomaFictionFest адну з галоўных узнагародаў (за лепшую рэжысуру) атрымаў фільм расейскага рэжысэра Сяргея зь мілагучным для беларускага вуха прозьвішчам Баброў «Апошні забой», музыку для якога напісаў таксама Сяргей, толькі ўжо Міхалок. Так што фільм Баброва абыйшоў ажно 140 іншых стужак з усяго сьвету.

Карацей, зь песьняй па жыцьці, Generation.by віншуе Ляпісаў, і ў прыватнасьці Сяргея, а таксама Баброва і ўсіх прыхільнікаў - «капіталістаў».

Паводле прэс-службы «Ляпіса Трубяцкога»